अब्बास शेख
दौंड : दौंड तालुक्यातील केडगाव येथे गाजलेल्या गर्भलिंगनिदान प्रकरणात आता मोठी कारवाई झाली असून केडगाव स्टेशन येथील पार्थ हॉस्पिटलच्या डॉ.संगीता पांडुरंग गायकवाड (वय ६१, केडगाव स्टेशन, ता.दौंड जि.पुणे) यांना अटक करण्यात आली असून त्यांना दौंड न्यायालयाकडून दोन दिवसांची पोलिस कोठडी सुनावण्यात आली आहे.
केडगाव गर्भलिंग निदान प्रकरणात आत्तापर्यंत पाचजणांवर गुन्हा दाखल करण्यात आला होता आता यात डॉ.संगीता गायकवाड यांचाही यामध्ये समावेश झाला आहे. गर्भलिंग निदान प्रकरणात या अगोदर यवत पोलिसांनी अण्णासाहेब गिरी, डॉ.अतुल जाधव, डॉ. मंदार माळी, सुंदरम कदम, डॉ.ठाकरे अश्या पाच जणांवर गुन्हा दाखल केला आहे.
केडगाव परिसरात गर्भलिंग निदान प्रकरण उघडकीस आल्यानंतर मोठी खळबळ माजली होती. यावेळी येथे गर्भलिंग निदान, गर्भपात करणाऱ्या डॉक्टर आणि एजंटची मोठी साखळी असल्याची चर्चा होतहोती. त्यावेळी प्रामुख्याने केडगाव स्टेशन येथे असलेल्या पार्थ हास्पिटलचे नाव हे आघाडीवर होते मात्र तरीही येथील डॉक्टरांवर कारवाई होत नसल्याने आश्चर्य व्यक्त केले जात होते. दि. १७ जून रोजी डॉ.संगीता पांडुरंग गायकवाड यांच्यावर अटकेची कारवाई झाल्याने यातून अजूनही मोठे रॅकेट बाहेर येईल अशी शक्यता वर्तवली जात आहे.
डॉ.संगीता गायकवाड यांना दोन दिवसांची पोलिस कोठडी – महिला डॉक्टर संगीता गायकवाड यांना दौंड न्यायालयासमोर उभे केले असता त्यांना दोन दिवसांची पोलिस कोठडी सुनावण्यात आली असून सदरची धडक कारवाई संदीप सिंह गिल्ल (पोलीस अधीक्षक, पुणे ग्रामीण), गणेश बिराजदार (अपर पोलीस अधीक्षक, बारामती विभाग), राजेंद्र मायने (पोलीस उपाधीक्षक, आर्थिक गुन्हे शाखा) आणि बापुसाहेब दडस (पोलीस उपाधीक्षक, दौंड उपविभाग) यांच्या मार्गदर्शानाखाली यवत पोलीस ठाण्याचे पोलीस निरीक्षक संतोष तासगावकर व विशेष तपास पथकातील (SIT) अधिकारी आणि त्यांच्या अंमलदारांच्या पथकाने यशस्वीरित्या पार पाडली आहे.
सदर गुन्ह्याचा पुढील अधिक सखोल तपास विशेष तपास पथक (SIT), पुणे ग्रामीण व यवत पोलीस संयुक्तपणे करत आहेत. यावेळी अशा प्रकारची बेकायदेशीर व अमानुष कृत्ये करणाऱ्यांची गय केली जाणार नाही, असा सज्जड इशारा पोलीस प्रशासनाने दिला आहे.
