दौंड | प्रतिनिधी
इन्सपायर्ड विंग्ज एज्युकेशनल फौंडेशन आणि रोटरी क्लब यांच्या संयुक्त विद्यमाने दौंड–पंढरपूर सायकल वारी यशस्वीपणे पूर्ण करणाऱ्या शिवछत्रपती सायकल ग्रुपच्या ४० जणांचा सत्कार आमदार ॲड. राहुल कुल यांच्या हस्ते उत्साहात करण्यात आला.
शिवछत्रपती सायकल ग्रुपतर्फे आयोजित करण्यात आलेल्या या सायकल वारीमध्ये लहान मुलांपासून ते ७५ वर्षांपर्यंतचे ज्येष्ठ नागरिक तसेच महिला अशा एकूण ४० सायकलस्वारांनी सहभाग घेतला. शिवछत्रपती सायकल ग्रुपच्या या प्रेरणादायी उपक्रमाचे सर्व स्तरातून कौतुक करण्यात येत आहे. या कार्यक्रमाची सुरुवात आमदार राहुल कुल यांच्या हस्ते सायकलचे पूजन करून आगळ्यावेगळ्या पद्धतीने करण्यात आली. त्यानंतर सर्व सहभागी सायकलस्वारांचा प्रशस्तीपत्र व पदक देऊन सन्मान करण्यात आला.
यावेळी आमदार राहुल कुल यांनी सायकलस्वारांचे अभिनंदन करत नियमित व्यायाम, सायकलिंग आणि निरोगी जीवनशैलीचे महत्त्व अधोरेखित केले. फिटनेस हा प्रत्येकाच्या दैनंदिन जीवनाचा भाग बनला पाहिजे, असे सांगत त्यांनी अशा उपक्रमांचे स्वागत केले.
या कार्यक्रमास नगरसेवक योगेश कटारिया, डॉ. पवार, पायल भंडारी, दरेकर, आण्णा जगताप, विजय जगदाळे, भाऊसाहेब वाघ, राजेंद्र जगताप, सुदर्शन जगताप, मधू जगदाळे, हरी ठोंबरे, मिलिंद कड यांच्यासह अनेक मान्यवर उपस्थित होते. कार्यक्रमाचे सूत्रसंचालन इन्सपायर्ड विंग्ज एज्युकेशनल फौंडेशनचे सचिव ॲड. प्रशांत गिरमकर यांनी केले.
