अब्बास शेख
केडगाव,दौंड : दौंड तालुक्यातील केडगाव येथे सर्वसामान्य कुटुंबात वास्तव्य करणाऱ्या राजेंद्र आनंदा मलभारे यांच्या ‘अनिकेत सीएनजी स्टेशन’ चा उदघाटन सोहळा दौंडचे विद्यमान आमदार राहुल कुल, माजी आमदार रमेश थोरात यांच्या उपस्थितीमध्ये आज शुक्रवार दि. २५ सप्टेंबर रोजी सकाळी ११.४५ वाजता पुणे सोलापूर हायवेवरील वाखारी हद्दीमध्ये पार पडला. यावेळी राष्ट्रवादी (अप) च्या राज्य महिलाध्यक्षा वैशालीताई नागवडे, अप्पासाहेब पवार, जिप सदस्य अविनाश कुदळे, धनाजी शेळके, प्रशांत शितोळे, डॉ. विशाल खळदकर, झुंबर गायकवाड यांसह विविध मान्यवर उपस्थित होते.
आमदार राहुल कुल यांनी प्रथम सर्वांना गणेशोत्सवाच्या शुभेच्छा देत आपल्या अध्यक्षीय भाषणाची सुरुवात केली. यावेळी त्यांनी राजेंद्र मलभारे, शुभम मलभारे आणि अनिकेत मलभारे यांना त्यांच्या नविन सीएनजी पंपाच्या शुभेच्छा देऊन प्रतिकूल परिस्थिती मध्ये मलभारे यांनी व्यवसाय सुरु केले आणि मेहनतीच्या जोरावर आज त्यांनी एक मोठे व्यवसायिक साम्राज्य उभे केल्याचे सांगितले. दौंड तालुक्यातील भूमी पुत्रांना त्यांच्या व्यवसाय धंद्यामध्ये सर्वोतोपारी मदत करत राहू आणि तालुक्यातील होतकरु युवकांच्या अडीअडचणीवेळी आम्ही कायम त्यांच्या पाठीशी उभे राहू असेही त्यांनी सांगितले.
बेबी कॅनॉल आणि पाण्याच्या योग्य नियोजनमुळे दौंडला दिलासा – सध्या पावसाने दडी मारल्याने राज्यावर दुष्काळ सदृश परिस्थिती ओढवली आहे मात्र दौंड तालुक्यात पाऊस नसला तरी बेबी कॅनॉल, जानाई शिरसाई, पुरंदर उपसा योजना माध्यमातून पाण्याचे उत्तम नियोजन केले असल्याने दौंडला याच्या कमी झळा बसत असल्याचे आमदार कुल यांनी सांगितले. पिण्याच्या पाण्याबाबत बोलताना त्यांनी, पिण्याचे पाण्याचे नियोजन हे पुढील ५० वर्षे तरी चनचन भासणार नाही असे करण्यात येत आहे त्यामुळे आपल्याला पाण्याची अडचण राहणार नसल्याचे त्यांनी पुन्हा अधोरेखित केले.
रस्ते चांगले झाले, होत आहेत आणि पुढेही चांगले बनविण्याचे सुरु आहे. रेल्वेबाबत उत्तम नियोजन सुरु असून नविन लोकल, नविन ट्रेन सूरु करण्याठी four ट्रॅक चे काम सुरु असून त्यामुळे दळणवळण वाढणार असल्याचे सांगितले. खडवासला टनेल काम जोरात सुरु आहे, चांगलं करावं वाईट टाळव असा माझा प्रयत्न असतो, जमीन विकू नये तर त्या ठेवाव्या त्यामुळे भविष्य उज्वल राहणार आहे याचे उत्तम उदाहरण चौफुला येथील शेतकरी असल्याचे सांगितले. पीएमआरडीए च्या माध्यमातून उत्तम नियोजन करत आहोत, शेतकऱ्यांना वेळोवेळी न्याय देण्याचा प्रयत्न करत राहू असे शेवटी त्यांनी सांगितले.
माजी आमदार रमेश थोरात यांनी राजेंद्र मलभारे आणि त्यांच्या कुटुंबियांना सीएनजी पंपासाठी शुभेच्छा देत वाखारी येथे पुणे बाजूकडून सोलापूर बाजूकडे जाणाऱ्या हायवेवर आणि आता सोलापूर बाजूकडून पुणे बाजूला जाणाऱ्या हायवेवर दोन्ही बाजूने राजेंद्र मलभारे यांनी सीएनजी पंप सुरु केल्याने याचा मोठा फायदा सीएनजी वाहनधारकांना होणार असल्याचे सांगितले आणि यापुढेही त्यांची अशीच प्रगती होत राहो अश्या शुभेच्छा दिल्या. यावेळी धनाजी शेळके, अप्पासाहेब पवार, वैशालीताई नागवडे यांनी आपले मनोगत व्यक्त केले तर कार्यक्रमाचे सूत्रसंचालन दत्ता सस्ते यांनी केले.
