दौंड : दौंड शहरातील कुंभारगल्ली परिसरात कारवाई करत दौंड पोलिसांनी १ किलो ९८ ग्रॅम (१०९८ ग्रॅम) गांजा जप्त केला असून या प्रकरणी ६७ वर्षीय व्यक्तीविरुद्ध एनडीपीएस कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, आयुब कादर शेख (वय ६७, रा. कुंभारगल्ली, ता. दौंड, जि. पुणे) याच्या राहत्या घरावर २८ जुलै २०२६ रोजी सायंकाळी सुमारे ५.१५ वाजण्याच्या सुमारास कारवाई करण्यात आली. या कारवाईत हिरवट पाने, फळे, काड्या व बिया असलेला उग्र वासाचा १०९८ ग्रॅम गांजा जप्त करण्यात आला. जप्त अंमली पदार्थाची अंदाजे किंमत ₹२०,००० इतकी असल्याचे पोलिसांनी सांगितले.
या प्रकरणी पोलीस हवालदार नितीन कैलास बोराडे यांनी फिर्याद दिली असून, दौंड पोलीस ठाण्यात गुन्हा क्रमांक ५२४/२०२६ अंतर्गत एनडीपीएस ॲक्ट कलम ८(क) व २०(ब)(ii)(ब) अन्वये गुन्हा दाखल करण्यात आला आहे. या प्रकरणाचा पुढील तपास सहायक पोलीस निरीक्षक अमोल गवळी करीत आहेत.
