जावेद इनामदार
बारामती : महसूल व वन विभागाच्या आदेशानुसार प्रस्तावित अपर जिल्हाधिकारी कार्यालय बारामतीबाबत नागरिकांनी आपल्या हरकती व सूचना जिल्हाधिकारी कार्यालयाकडे ८ जुलै २०२६ पर्यंत सादर कराव्यात असे आवाहन जिल्हाधिकारी जितेंद्र डुडी यांनी केले आहे.
प्रस्तावित अपर जिल्हाधिकारी कार्यालयामध्ये बारामतीच्या कार्यक्षेत्रातील बारामती, इंदापूर, आणि दौंड या ३ तालुक्यांचा समावेश करण्यात आला आहे. तसेच जिल्हाधिकारी कार्यालयाच्या कार्यक्षेत्रात असणाऱ्या पुणे शहर, आंबेगाव, खेड, मावळ, मुळशी, हवेली, शिरुर, पुरंदर, जुन्नर, भोर आणि राजगड या ११ तालुक्याचा समावेश करण्यात आला आहे.
सध्या पुणे जिल्ह्यातील तालुक्यांची एकुण संख्या ही १४ असून या सर्व तालुक्यांसाठी जिल्हा पुणे असणार आहे, अशी माहिती जिल्हाधिकारी डुडी यांनी दिली आहे. पुणे जिल्ह्यात अगोदर १३ तालुक्यांचा समावेश होता मात्र यात राजगड तालुक्याची भर पडल्याने आता त्याची संख्या १४ इतकी झाली आहे. बारामती येथे अपर जिल्हाधिकारी कार्यालय झाल्यानंतर बारामती, इंदापूर आणि दौंडच्या नागरिकांची कामे बारामती येथेच होणार असून पुण्याला जाताना होणारी ट्रॅफिक ची समस्या आणि लागणारा वेळ वाचणार आहे.
