सुधीर गोखले
सांगली : गावोगावी भटकून गुजरान करणारे आणि भिक्षा मागून आपले जीवन व्यतित करणाऱ्या कुटुंबांबरोबर मिरजेतील काही भाजप युवा मोर्च्याच्या पदाधिकाऱ्यांनी आपली दिवाळी साजरी केली आहे. या कुटुंबांतील पुरुषांना टॉवेल, टोपी आणि महिलांना साड्या देऊन या कुटुंबांसमवेत फराळ खाऊन हा दिवाळीचा उपक्रम साजरा करण्यात आला आहे.
मिरज शहराच्या बाहेरील भागात माळरानावर सध्या काही कुटुंबे वस्ती करून राहत आहेत. यात काही डोंबारी समाजातील तर काही बहुरूपे आहेत तर कोणी अक्षरशः भिकारी आहेत. ही गोष्ट सांगली जिल्हा भाजपा युवा मोर्चा अध्यक्षपदी नुकतीच निवड झालेले दिगंबर जाधव यांना समजल्यानंतर त्यांनी भाजप युवा मोर्चा राज्य सचिव सागर वनखंडे यांच्याकडे या कुटुंबाबरोबर दिवाळी साजरी करण्याचा मनोदय व्यक्त केला. एक क्षणाचाही विलंब न करता सागर वनखडे यांनी वरिष्ठ नेत्यांशी या संदर्भात चर्चा केली. भाजप प्रदेशाध्यक्ष चंद्रशेखर बावनकुळे यांच्या ‘एक दिवा वंचितांसाठी पालावरची दिवाळी’ उपक्रमा अंतर्गत सचिव सागर वनखंडे आणि दिगंबर जाधव यांनी या वस्तीवर आपल्या कार्यकर्त्यांसह समक्ष भेट दिली.
या वस्त्यांवर असलेला अंधार त्यांनी दिवे लावून आणि फराळ आणि महिलांसाठी साड्या आणि पुरुषांना टॉवेल टोपीचे वाटप करून त्यांची दिवाळी गोड केली. सध्या दिवाळी निमित्त सर्वत्र खरेदीचा उत्साह ओसंडून वाहताना पाहायला मिळत आहे. सर्वत्र दिवाळीनिमित्त झालेल्या रोषणाईचा झगमगाट असताना गावोगावी भटकून उदरनिर्वाह करणाऱ्या विविध समाजातील आपल्या बांधवांच्या झोपड्यामध्ये मात्र अंधार आहे. ‘एक दिवा वंचितासाठी पालावरची दिवाळी’ या उपक्रमाचे आयोजन भाजप प्रदेशाध्यक्ष चंद्रशेखर बावनकुळे यांच्या मार्गर्शनाखाली सध्या राज्यभर सर्वत्र राबवले जात आहे.
या अनुषंगाने दिवाळी फराळाचा आनंद या भटक्या समाज बांधवांना मिळावा यासाठी भाजप युवा मोर्चा सांगली जिल्हा शहर विभागातर्फे तासगाव फाटा येथे सोलापूर आणि धाराशिव येथून भटकंती करत आलेल्या डवरी गोसावी, नागपंथ आणि बहुरूपी बांधवांसोबत भाजप युवा मोर्चा कार्यकर्त्यांनी दिवे लाऊन फराळ आणि भाऊबीज निमित्त साड्या वाटप करून दिवाळी साजरी केली. या उपक्रमाने भटक्या बांधवांच्या कुटुंबाच्या चेहऱ्यावर आज दिवाळी सणाचा आनंद पहायला मिळाला. भाजप पश्चिम महाराष्ट्र संघटन प्रमुख मकरंद देशपांडे, अनु जाती मोर्चा चे प्रदेश सचिव प्रा. मोहन वनखंडे, नगरसेवक गणेश माळी, विक्रम पाटील, बाबासाहेब आळेकर, संदीप कुकडे, प्रकाश पाटील, अनिल हारगे विकास मोरे, विशाल सागरे, महेश फोंडे, अभिरूप कांबळे यांनी या उपक्रमामध्ये सहभाग घेतला.
