बारामती | प्रतिनिधी
वडगाव निंबाळकर पोलिसांनी हायवा टिपर चोरी प्रकरणाचा अवघ्या काही तासांत छडा लावत दोन आरोपिंना जेरबंद करुन सुमारे ८ लाख किंमतीचा मुद्देमाल हस्तगत केला आहे.
पोलिसांनी दिलेल्या माहितीनुसार, २२ जुलै २०२६ रोजी रात्री ८ ते २३ जुलै रोजी सकाळी ९ या कालावधीत मुढाळे (ता.बारामती) येथील माळशिखरे यांच्या हिंदुस्तान पेट्रोलियम कंपनीच्या पंपावरुन हायवा टिपर चोरीला गेल्याची घटना घडली होती. याप्रकरणी वडगाव निंबाळकर पोलीस ठाण्यात गुन्हा दाखल करण्यात आला होता.
गुन्ह्याचा तपास सुरू असताना सहाय्यक पोलीस निरीक्षक जीवन मोहिते यांनी वरिष्ठांच्या मार्गदर्शनाखाली पोलीस पथक तयार करुन तांत्रिक माहिती व गोपनीय बातमीदारांच्या मदतीने तपास करत वाळुंज एमआयडीसी येथून टिपर आणि आरोपी राहुल विठ्ठल कराळे (वय ३१) आणि आदित्य रमेश कराळे (वय २५, दोघेही रा.सिरेगाव, ता. गंगापूर, जि. संभाजीनगर) या दोन ताब्यात घेतले. चौकशीत त्यांनी चोरीची कबुली दिल्यानंतर त्यांच्याकडून सुमारे ८ लाख किमतीचे टिपर जप्त करण्यात आले. या गुन्ह्याचा पुढील तपास पोलीस हवालदार भागवत पाटील करीत आहेत.
ही कामगिरी पोलीस अधीक्षक पुणे ग्रामीण संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम यांच्या मार्गदर्शनाखाली सहाय्यक पोलीस निरीक्षक जीवन मोहिते यांच्यासह पोलीस हवालदार भागवत पाटील, महेश पन्हाळे, पोपट नाळे, अनिल खेडकर, हृदयनाथ देवकर, पोना.भाऊसाहेब मारकड, पोशि.आबा जाधव, नरेंद्र यादव, सूरज धोत्रे, धनंजय भोसले, विकास येताळे यांनी केली आहे.
