बारामती | जावेद इनामदार |
बारामती येथील एस.टी. को-ऑपरेटिव्ह बँक लिमिटेड, मुंबईचे संचालक तथा बारामती एस.आय.डी.सी. डेपोचे वाहतूक नियंत्रक अनिल तुकाराम बनकर (वय ५१, व्यवसाय नोकरी, पद-वाहतूक नियंत्रक नेमणूक- बारामती एम.आय.डी.सी. डेपो तसेच संचालक एस.टी को-ऑपरेटिव्ह बँक लिमिटेड, मु. पो. पणदरे, तालुका बारामती, जिल्हा-पुणे) यांना ४ लाख रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ पकडले. ही कारवाई गुरुवार, दि. २३ जुलै २०२६ रोजी सायंकाळी ६.१९ वाजता बारामती एस.टी. स्टँडसमोरील रोडवर उभ्या असलेल्या चारचाकी वाहनात करण्यात आली.
एसीबीने दिलेल्या माहितीनुसार, तक्रारदाराने एस.टी. को-ऑपरेटिव्ह बँक लिमिटेडच्या बारामती शाखेसाठी फर्निचर नूतनीकरणाचे काम केले होते. या कामाचे एकूण ४८ लाख ६० हजार ४५५ रुपये इतके बिल झाले होते. त्यापैकी ४० लाख रुपये अदा करण्यात आले असून ८ लाख ६० हजार ४५५ रुपये तसेच इतर किरकोळ कामांचे ४ लाख ९८ हजार रुपये देणे बाकी होते.
या प्रकरणात उर्वरित बिल मंजूर करून देण्यासाठी तसेच बँकेच्या संचालक मंडळाकडून मंजुरी मिळवून देण्याच्या मोबदल्यात आरोपी अनिल बनकर यांनी सुरुवातीला ५ लाख रुपयांची लाच मागितली होती. पडताळणीदरम्यान त्यांनी ही मागणी वाढवून ६ लाख रुपये केली. चर्चेनंतर तडजोड होऊन ४ लाख रुपये स्वीकारण्याचे ठरले. तक्रारदाराच्या तक्रारीची पडताळणी करून एसीबीने सापळा रचला. त्यानुसार अनिल बनकर यांनी बारामती एस.टी. स्टँडसमोरील रोडवर उभ्या असलेल्या MH-42 BE-5787 या वाहनात तक्रारदाराकडून ४ लाख रुपयांची लाच स्वीकारताच एसीबीच्या पथकाने त्यांना रंगेहाथ पकडले.
या प्रकरणी बारामती शहर पोलीस ठाणे येथे भ्रष्टाचार प्रतिबंधक अधिनियम, १९८८ च्या कलम ७ अन्वये गुन्हा नोंदविण्याची प्रक्रिया सुरू असून पुढील तपास एसीबीकडून करण्यात येत आहे. ही कारवाई एसीबी, पुणे यांच्या पथकाने केली असून एसीबी पोलीस निरीक्षक संतोष पाटील यांनी सापळा अधिकारी, तर एसीबी चे पोलीस निरीक्षक सुहास हट्टेकर यांनी तपास अधिकारी म्हणून काम पाहिले.
