अब्बास शेख
दौंड : दौंडचे आमदार राहुल कुल आणि मुख्यमंत्री देवेंद्र फडणवीस यांची जवळीक सर्वत्र प्रसिद्ध आहे. नुसते दौंडच नव्हे तर पुणे जिल्ह्यातील विविध तालुक्यातील नेते मंडळी सुद्धा मुख्यमंत्र्यांकडे काही काम निघाले तर आमदार राहुल कुल यांची आवर्जून भेट घेत अगोदर त्यांच्याशी चर्चा करतात हे आता लपून राहिलेले नाहीये. नुसते संबंध चांगले ठेवून फायदा नसतो तर ते चांगले संबंध आपल्या तालुक्याच्या फायद्यासाठी वापरण्याचे कसबही आमदार राहुल कुल यांनी अगोदरच आत्मसात केले असून याचा मोठा फायदा आता दौंड तालुक्याला होताना दिसत आहे.
मागील दोन आठवड्यामध्ये आमदार राहुल कुल यांच्या मागणी आणि पाठपुराव्यामुळे पाटस येथे कृषी उत्पन्न बाजार समितीसाठी मुख्यमंत्री फडणवीसांनी ४ हेक्टर म्हणजे १० एकर जमीन मंजूर केल्यानंतर आता केडगाव कृषी उत्पन्न बाजार समितीसाठी सुद्धा आमदार राहुल कुल यांच्या मागणी व पाठपुराव्यानुसार नविन बाजार आवार उभारणी करीता ८ हेक्टर म्हणजे २० एकर जमीन देण्याचा निर्णय घेण्यात आला आहे.
याबाबतची अधिकृत घोषणा महसूल मंत्री चंद्रशेखर बावनकुळे यांनी केली असून आमदार राहुल कुल यांच्या सततच्या पाठपुराव्याने मुख्यमंत्री देवेंद्र फडणवीस यांच्या सूचनेनुसार व महसूल मंत्री चंद्रशेखर बावनकुळे यांच्या पुढाकारातून दौंड कृषी उत्पन्न बाजार समितीला नवीन बाजार आवार उभारण्यासाठी शासकीय गायरान जमीन देण्याचा निर्णय घेण्यात आला आहे. पुणे जिल्ह्यातील केडगाव गाव येथील ८ हेक्टर शासकीय गायरान जमीन यासाठी अवघ्या एक रुपया कब्जे हक्क शुल्काने देण्यात येणार आहे.
या निर्णयामुळे शेतकऱ्यांना अत्याधुनिक बाजार सुविधा मिळणार असून कृषी मालाच्या खरेदी-विक्रीसाठी सक्षम पायाभूत सुविधा निर्माण होऊन स्थानिक कृषी अर्थव्यवस्थेला मोठी चालना मिळणार आहे. शासनाच्या या निर्णयाचे आणि आ.कुल यांच्या पाठपुराव्याचे दौंड तालुक्यातील शेतकऱ्यांकडून स्वागत केले जात आहे.
