सायबर गुन्ह्यांपासून सावध राहा; नागरिकांनी डिजिटल सुरक्षिततेबाबत जागरूक व्हावे – यवत पोलीस

यवत, दौंड : नागरिकांमध्ये सायबर गुन्ह्यांविषयी जनजागृती निर्माण करण्याच्या उद्देशाने यवत पोलीस स्टेशनच्या वतीने शनिवारी (१ ऑगस्ट) सायबर जनजागृती कार्यशाळेचे आयोजन करण्यात आले. या कार्यशाळेत ऑनलाइन फसवणुकीचे विविध प्रकार, त्यापासून बचावाचे उपाय तसेच सुरक्षित डिजिटल व्यवहाराबाबत सविस्तर मार्गदर्शन करण्यात आले.

पुणे ग्रामीणचे पोलीस अधीक्षक श्री. संदीप गिल व बारामती विभागाचे अपर पोलीस अधीक्षक श्री. गणेश बिरादार यांच्या मार्गदर्शनाखाली यवत पोलीस स्टेशनच्या मिटिंग हॉलमध्ये ही कार्यशाळा पार पडली. उपविभागीय पोलीस अधिकारी श्री. बापूराव दडस यांच्या प्रमुख उपस्थितीत पोलीस निरीक्षक संतोष तासगावकर, सहाय्यक पोलीस निरीक्षक सुधीर कदम, सुवर्णा गोसावी, आबा गाढवे यांनी उपस्थित प्रतिष्ठित नागरिक, ज्येष्ठ नागरिक, पत्रकार, शांतता समिती, मोहल्ला समिती तसेच महिला दक्षता समितीच्या सदस्यांना मार्गदर्शन केले.

कार्यशाळेमध्ये डिजिटल अटक (Digital Arrest), UPI/QR कोड फसवणूक, OTP/KYC फसवणूक, फिशिंग, व्हॉट्सअॅप हॅकिंग, सोशल मीडिया फसवणूक, ऑनलाइन शॉपिंग फसवणूक, नोकरीच्या आमिषाने होणारी फसवणूक, गुंतवणूक व ट्रेडिंग फसवणूक, लोन अॅप, सिम स्वॅप, रिमोट ॲक्सेस अॅप, सेक्सटॉर्शन तसेच पार्सल/कुरिअर फसवणूक अशा विविध सायबर गुन्ह्यांची माहिती उदाहरणांसह देण्यात आली.

नागरिकांनी कोणत्याही अनोळखी व्यक्तीस OTP, बँक खात्याची माहिती, ATM कार्ड क्रमांक, UPI PIN किंवा इतर वैयक्तिक माहिती देऊ नये. संशयास्पद लिंकवर क्लिक करू नये. फसवणूक झाल्याचे लक्षात येताच तात्काळ 1930 या राष्ट्रीय सायबर हेल्पलाईनवर संपर्क साधावा किंवा www.cybercrime.gov.in या पोर्टलवर तक्रार नोंदवावी, असे आवाहन करण्यात आले. कार्यशाळेच्या शेवटी उपस्थितांना सायबर सुरक्षा शपथ देण्यात आली तसेच जनजागृतीपर माहितीपत्रकांचे वितरण करण्यात आले.

यवत पोलीस स्टेशनने सर्व नागरिकांना ऑनलाइन व्यवहार करताना सतर्क राहण्याचे, अफवा व फसवे संदेशांपासून सावध राहण्याचे आणि सायबर गुन्हे रोखण्यासाठी पोलीस प्रशासनाला सहकार्य करण्याचे आवाहन केले आहे.