पुणे : खडकवासला धरणाच्या पाणीपातळीत झपाट्याने वाढ होत असून पाणलोट क्षेत्रात सुरू असलेल्या अतिवृष्टीमुळे आज (३१ जुलै) दुपारी ३.०० वाजता धरणाच्या सांडव्यावरून मुठा नदीपात्रात पाण्याचा विसर्ग वाढविण्यात येणार आहे.
खडकवासला पाटबंधारे विभागाने दिलेल्या माहितीनुसार, सध्या सुरू असलेल्या विसर्गामध्ये ३५,५७४ क्युसेकने वाढ करून एकूण विसर्ग ४३,५७१ क्युसेक इतका करण्यात येणार आहे. पावसाचे प्रमाण आणि धरणात होणाऱ्या पाण्याच्या आवकानुसार हा विसर्ग पुढील काळात कमी अथवा अधिक केला जाऊ शकतो, असेही विभागाने स्पष्ट केले आहे.
प्रशासनाने नदीकाठच्या नागरिकांना विशेष सतर्क राहण्याचे आवाहन केले आहे. कोणत्याही परिस्थितीत नदीपात्रात उतरू नये. तसेच नदीपात्रात असलेले साहित्य, वाहने किंवा जनावरे तात्काळ सुरक्षित ठिकाणी हलवावीत. सखल भागातील नागरिकांना वेळेत सूचना देऊन आवश्यक ती खबरदारी घेण्याच्या सूचना संबंधित यंत्रणांना देण्यात आल्या आहेत.
खडकवासला पाटबंधारे विभागाचे कार्यकारी अभियंता यांनी नागरिकांनी अफवांवर विश्वास न ठेवता अधिकृत सूचनांचे पालन करावे आणि स्वतःची तसेच इतरांची सुरक्षितता जपण्यासाठी आवश्यक ती दक्षता घ्यावी, असे आवाहन केले आहे.
