केडगाव : बारामती कॉलेज ऑफ फार्मसी, बारामती येथे आयोजित करण्यात आलेल्या राष्ट्रीय स्तरावरील पोस्टर सादरीकरण स्पर्धेत श्री धनाजी शेळके कॉलेज ऑफ फार्मसी, वाखारीच्या विद्यार्थिनींनी उल्लेखनीय यश संपादन करून महाविद्यालयाच्या शैक्षणिक गुणवत्तेची राष्ट्रीय स्तरावर छाप उमटवली आहे.
महाविद्यालयाच्या द्वितीय वर्ष डिप्लोमा इन फार्मसीच्या विद्यार्थिनी कु. प्रतीक्षा डोंबे आणि कु. गायत्री गायकवाड यांनी उत्कृष्ट विषय मांडणी, प्रभावी पोस्टर निर्मिती आणि आत्मविश्वासपूर्ण सादरीकरणाच्या जोरावर प्रथम क्रमांक पटकावला. या स्पर्धेत विविध महाविद्यालयांतील विद्यार्थ्यांनी उत्स्फूर्त सहभाग नोंदवत आपल्या संशोधनात्मक व नाविन्यपूर्ण कल्पना पोस्टरच्या माध्यमातून सादर केल्या. विद्यार्थ्यांच्या सादरीकरणातून विषयाचे ज्ञान, वैज्ञानिक दृष्टिकोन, सर्जनशीलता, प्रभावी संवादकौशल्य आणि विषयाची मांडणी यांचे परीक्षण करण्यात आले. या सर्व बाबींमध्ये प्रतीक्षा डोंबे आणि गायत्री गायकवाड यांनी उत्कृष्ट कामगिरी करत परीक्षकांची मने जिंकली आणि प्रथम क्रमांक मिळविला.
विजेत्या विद्यार्थिनींना ट्रॉफी, प्रशस्तीपत्रक तसेच रोख ३,०००/- रुपयांचे पारितोषिक देऊन गौरविण्यात आले. राष्ट्रीय स्तरावरील या स्पर्धेत मिळविलेल्या यशामुळे विद्यार्थिनींच्या आत्मविश्वासाला मोठी चालना मिळाली असून, त्यांच्या या कामगिरीचे सर्व स्तरातून कौतुक होत आहे. या यशामागे विद्यार्थिनींची मेहनत, सातत्य, विषयावरील सखोल अभ्यास आणि प्रभावी सादरीकरणासोबतच त्यांना मिळालेले योग्य मार्गदर्शन महत्त्वाचे ठरले. प्रा. रूखसार बागवान यांनी विद्यार्थिनींना स्पर्धेच्या तयारीदरम्यान विषय निवड, पोस्टरची मांडणी, आशयाचे सादरीकरण तसेच सादरीकरणातील बारकावे याबाबत मार्गदर्शन केले.
विद्यार्थिनींच्या या उल्लेखनीय यशाबद्दल संस्थेचे अध्यक्ष श्री. धनाजी शेळके, सचिव सौ. राधिका शेळके, उपप्राचार्य प्रा. विकास गडधे, मार्गदर्शक प्रा. रूखसार बागवान तसेच महाविद्यालयातील सर्व प्राध्यापक व शिक्षकेतर कर्मचाऱ्यांनी विजेत्या विद्यार्थिनींचे अभिनंदन केले. त्यांच्या पुढील शैक्षणिक व व्यावसायिक वाटचालीस शुभेच्छा देण्यात आल्या.
महाविद्यालयामध्ये विद्यार्थ्यांच्या सर्वांगीण विकासासाठी केवळ अभ्यासक्रमापुरते मर्यादित न राहता पोस्टर सादरीकरण, संशोधनात्मक उपक्रम, विविध स्पर्धा, शैक्षणिक प्रकल्प आणि सहशैक्षणिक उपक्रमांना प्रोत्साहन दिले जाते. त्याचाच परिणाम म्हणून विद्यार्थ्यांना विविध स्तरांवर आपली गुणवत्ता सिद्ध करण्याची संधी मिळत आहे. राष्ट्रीय स्तरावरील पोस्टर सादरीकरण स्पर्धेत प्रथम क्रमांक मिळवून प्रतीक्षा डोंबे आणि गायत्री गायकवाड यांनी महाविद्यालयाच्या यशाच्या शिरपेचात आणखी एक मानाचा तुरा खोवला असून, त्यांच्या या यशामुळे महाविद्यालयाच्या शैक्षणिक लौकिकात निश्चितच भर पडली आहे.
