दौंड : पुणे जिल्हा ग्रामीणचे पोलीस अधीक्षक अभिनव देशमुख, दौंड चे उपविभागीय पोलीस अधिकारी राहुल धस यांच्या मार्गदर्शनाने व पोलीस निरीक्षक विनोद घुगे यांच्या पुढाकाराने, भारतीय स्वातंत्र्य दिनाच्या अमृत महोत्सवानिमित्त हर घर तिरंगा मोहिमेचा प्रचार करण्यासाठी शहरातून फेरी काढित जनजागृती करण्यात आली.
भारतीय स्वातंत्र्य दिनाला 75 वर्ष पूर्ण होत असल्याच्या पार्श्वभूमीवर संपूर्ण देशामध्ये हर घर तिरंगा उपक्रमासाठी जनजागृती अभियान राबविले जात आहे. सदरचा उपक्रम जास्तीत जास्त लोकांपर्यंत पोहोचावा आणि स्वातंत्र्य दिनाचे महत्त्व अधोरेखित व्हावे या उद्देशाने संपूर्ण देशामध्ये सदरचा उपक्रम राबविला जात आहे. सर्व देशवासीयांनी हर घर तिरंगा उपक्रमात सहभागी होऊन आपल्या घरांवर तिरंगा फडकावावा असे आवाहन प्रशासनातर्फे करण्यात आले आहे.
दौंड पोलिसांनी आयोजित केलेल्या हर घर तिरंगा जनजागृती रॅलीमध्ये पोलीस निरीक्षक विनोद घुगे सह 5 पोलीस अधिकारी, ६० पोलीस कर्मचारी व 10 होमगार्ड यांचा सहभाग होता.
