दौंड
छत्रपती शिवाजी महाराजांच्या राज्याभिषेक दिनाचे (स्वराज्य दिन) औचित्य साधित येथील जनकर्तव्य सामाजिक युवा संघटनेच्या वतीने, दौंड उपजिल्हा रुग्णालयाला भारतरत्न संत मदर तेरेसा यांचे नाव देण्याची मागणी प्रशासनाकडे करण्यात आली. मागणीचे निवेदन दौंड तहसीलदार संजय पाटील व उपजिल्हा रुग्णालयाचे अधीक्षक डॉ संग्राम डांगे यांना देण्यात आले.
संत मदर तेरेसा यांना नोबेल तसेच भारतरत्न पुरस्काराने सन्मानित करण्यात आले आहे. त्या फक्त समाज सेविकाच नव्हत्या तर स्त्री सशक्तीकरणामध्येही त्यांचा सिंहाचा वाटा होता. सध्या थोर समाज सुधारकांचे विचार पुसत चालले आहेत, अशा थोर व्यक्तींचे विचार व त्यांनी केलेल्या मानव हिताचे संस्कार जिवंत रहावेत यासाठी या रुग्णालयाला संत मदर तेरेसा यांचे नाव दिले गेले तर त्यांचे विचार व संस्कार जिवंत राहतील. तसेच सध्याच्या युवा पिढीला प्रेरणा मिळेल. असे निवेदनामध्ये नमूद करण्यात आले आहे.
संघटनेचे अनिकेत मिसाळ,विकी सरवदे, हिरालाल साळवे, अक्षय शिखरे, आकाश झोजे, तुषार कोळी, सईम मिरजकर ,अनिकेत सोनवणे, अभिषेक जाधव आदी उपस्थित होते.
