पुणे | दिनांक २२ नोव्हेंबर रोजी प्राथमिक आरोग्य केंद्र केडगाव, तालुका दौंड, जिल्हा पुणे येथे उपराष्ट्रीय पल्स पोलिओ लसीकरण मोहीम उत्साहपूर्ण वातावरणात राबविण्यात आली. या मोहिमेचे उद्घाटन पंचायत समिती सदस्य धनंजय शेळके व केडगावच्या सरपंच सौ. पूनम बारवकर यांच्या शुभहस्ते करण्यात आले.
या मोहिमेअंतर्गत ० ते ५ वर्षे वयोगटातील एकूण 5385 बालकांना पोलिओचा अतिरिक्त डोस देण्याचे उद्दिष्ट ठेवण्यात आले होते. या मोहिमेसाठी एकूण ३३ लसीकरण बूथ कार्यान्वित करण्यात आले होते. तसेच आरोग्य कर्मचारी, आशा स्वयंसेविका, अंगणवाडी सेविका व इतर सहकारी मिळून एकूण ७४ मनुष्यबळ तैनात करण्यात आले होते.
आरोग्य विभागाच्या अधिकारी व कर्मचाऱ्यांनी केलेल्या नियोजनबद्ध व सामूहिक प्रयत्नांमुळे या मोहिमेत ९७.१० टक्के लसीकरणाचे उद्दिष्ट साध्य करण्यात आले. या मोहिमेचे यशस्वी नियोजन व अंमलबजावणी वैद्यकीय अधिकारी डॉ. निलिमा लोखंडे व डॉ. युवराज शेळके यांच्या मार्गदर्शनाखाली करण्यात आले.
बालकांना पोलिओपासून सुरक्षित ठेवण्यासाठी प्रत्येक पालकाने आपल्या ० ते ५ वर्षे वयोगटातील बालकाला पोलिओचा डोस देणे आवश्यक आहे. एकही बालक पोलिओच्या डोसपासून वंचित राहू नये असा संदेश या मोहिमेद्वारे देण्यात आला. या मोहिमेच्या यशस्वितेसाठी सर्व आरोग्य कर्मचारी, आशा स्वयंसेविका, अंगणवाडी सेविका, ग्रामपंचायत पदाधिकारी व ग्रामस्थांचे मोलाचे सहकार्य लाभले अशी माहिती डॉ.निलिमा लोखंडे यांनी दिली.







