मुंबई : दौंड तालुक्यातील विविध सिंचन प्रकल्प व प्रलंबित प्रश्नांबाबत जलसंपदा मंत्री राधाकृष्ण विखे पाटील यांच्या अध्यक्षतेखाली मुंबई येथे महत्त्वपूर्ण आढावा बैठक आयोजित करण्यात आली होती. यावेळी दौंड चे आमदार राहुल कुल तसेच विविध अधिकारी उपस्थित होते. यावेळी दौंड तालुक्यातील महत्त्वपूर्ण सिंचन प्रकल्पांचा सविस्तर आढावा घेण्यात आला.
मुळशी धरणातील पाणी मूळ पूर्वमुखी वळविणे, नवीन मुठा उजवा कालवा किमी १ ते ३४ दरम्यान खडकवासला – फुरसुंगी बोगदा प्रकल्प वेळेत पूर्ण करण्यात यावा व त्यासाठी आवश्यक निधीची तरतूद करण्यात यावी, जनाई–शिरसाई व पुरंदर उपसा सिंचन योजनेच्या संदर्भातील आवश्यक कार्यवाही करावी, उजनी धरणातील बॅकवॉटर क्षेत्रात बांधण्यात येणाऱ्या बॅरेज तसेच कोल्हापूर पद्धतीच्या बंधाऱ्यांचे बॅरेज मधे रूपांतर करण्याच्या संदर्भातील कामांच्या प्रगतीबाबत मंत्री विखे पाटील आणि आमदार राहुल कुल यांच्यामध्ये चर्चा झाली.
चिबड जमिनींचे सर्वेक्षण करून निर्मूलन करण्यासाठी पायलट प्रोजेक्ट म्हणून आवश्यक ते प्रस्ताव सादर करून मान्यता प्राप्त करून घेण्यात यावी याबाबतही चर्चा झाली असून कालबद्ध कार्यक्रम राबविण्याच्या सूचना करण्यात आल्या आहेत. प्रकल्पांची प्रलंबित कामे गतीने पूर्ण करणे, आवश्यक निधी उपलब्ध करून देणे आणि शेतकऱ्यांना सिंचनासाठी शाश्वत पाणी उपलब्ध करून देण्यासाठी आवश्यक उपाययोजनांवर बैठकीत सकारात्मक चर्चा झाली. संबंधित कामे वेळेत पूर्ण करण्याच्या सूचनाही मंत्री महोदयांनी अधिकाऱ्यांना दिल्या.
दौंड तालुक्यातील दुष्काळी व अवर्षणग्रस्त भागाला हक्काचे आणि शाश्वत पाणी मिळवून देणे, हा आमचा प्राधान्यक्रम आहे. शेतकऱ्यांच्या पाण्याचा प्रश्न कायमस्वरूपी मार्गी लावण्यासाठी शासन कटिबद्ध असून, सिंचन प्रकल्पांना गती देण्यासाठी पुढील कार्यवाही लवकरच करण्यात येणार आहे.
