रत्नागिरी : खेड येथील ज्ञानदीप शिक्षण प्रसारक मंडळ खेड (रत्नागिरी) संचालित कै. प्रभाकर गजानन कांबळे ज्ञानदीप विद्या मंदिर, भडगाव (माध्यमिक विभाग) व कै. श्रीमती राधाबाई चंदुलाल तलाठी ज्ञानदीप विद्या मंदिर, भडगाव (उच्च माध्यमिक विभाग) या प्रशालेचे पर्यवेक्षक व क्रीडा शिक्षक व इतिहास नागरिकशास्त्र विषयाचे शिक्षक संतोष तुकाराम भोसले (मुळ रा.केडगाव, ता.दौंड जि.पुणे) यांना रिजनल टीचर्स ऑर्गनायझेशन (RTO) (कार्यक्षेत्र भारत) दापोली यांच्यावतीने रत्नागिरी जिल्ह्यस्तरीय आदर्श शिक्षक विद्यारत्न पुरस्कार -2026 देऊन त्यांचा सन्मान करण्यात आला आहे.
रिजनल टीचर्स ऑर्गनायझेशन (RTO) मार्फत संपूर्ण महाराष्ट्रात शैक्षणिक व सामाजिक क्षेत्रात उल्लेखनीय काम करीत असलेले शिक्षक, मुख्याध्यापक व शैक्षणिक संस्था यांना पुरस्कारांचे वितरण केले जाते. प्रशालेचे पर्यवेक्षक व क्रीडा शिक्षक व इतिहास नागरिकशास्त्र विषयाचे शिक्षक संतोष तुकाराम भोसले यांना शैक्षणिक क्षेत्रात उल्लेखनीय कामगिरी करण्याचा सातत्याने प्रयत्न व महत्त्वपूर्ण योगदान देत असल्याने त्यांना या पुरस्काराने गौरविण्यात आले आहे.
शिक्षक संतोष भोसले हे मागील 25 वर्षापासून शिक्षण क्षेत्रात उल्लेखनीय कामगिरी करण्यासाठी सतत कार्यरत राहून इतिहास विषयाचे उत्कृष्ट मार्गदर्शन, नेटबॉल सारख्या खेळात राष्ट्रीय स्तरापर्यंत खेळाचे मार्गदर्शन, स्काऊट गाईड राष्ट्रीय जांबोरी सहभाग, राष्ट्रपती पुरस्कारप्राप्त स्काऊट व स्काऊट राज्य पुरस्कार मार्गदर्शक असून ते विद्यार्थ्यांच्या सर्वांगीण विकासासाठी सतत कार्यरत राहण्याचा प्रयत्न करीत आहेत. RTO दापोलीने या सर्व कार्याची दखल घेऊन हा पुरस्कार त्यांना दिला हे ज्ञानदीप परिवाराला अभिमानास्पद असून भोसले यांच्यावर अभिनंदनाचा वर्षाव होत आहे.
