केडगाव,दौंड : पाटबंधारे विभागाच्या हद्दीची मोजणी करण्यासाठी गेलेल्या अधिकारी व कर्मचाऱ्यांच्या शासकीय कामात अडथळा आणून त्यांच्याशी वाद घालत एका व्यक्तीने महिला अधिकाऱ्याचा अपमान करतत्यांच्या मनास लज्जा उत्पन्न होईल असे कृत्य केले. तसेच त्यांच्या सोबत असणाऱ्या कर्मचाऱ्यांना लाथाबुक्क्यांनी मारहाण करून शिवीगाळ व जीवे मारण्याची धमकी दिली असल्याची तक्रार देण्यात आल्याने संबंधित व्यक्तीवर यवत पोलीस ठाण्यात गुन्हा दाखल करण्यात आला असल्याची माहिती यवत पोलिसांनी दिली आहे.
सौ. रोहिणी कैलास पासलकर (वय 33, व्यवसाय नोकरी, सहायक अभियंता वर्ग-2, पाटबंधारे शाखा केडगाव) यांनी याबाबत फिर्याद दिली असून त्यांच्या फिर्यादीवरून नेताजी खराडे (पूर्ण नाव माहीत नाही, रा. केडगाव, ता. दौंड, जि. पुणे) या इसमाविरुद्ध गुन्हा दाखल करण्यात आला आहे.
यवत पोलिसांनी दिलेल्या अधिक माहितीनुसार केडगाव येथील पाटील निंबाळकरवस्ती परिसरात पाटबंधारे विभागाच्या नावे असलेल्या कंटूर क्षेत्राच्या हद्द मोजणीचे काम सुरू होते. ही मोजणी सुरु असताना आरोपीने तेथे येत फिर्यादी महिला अधिकाऱ्याशी अपमानास्पद भाषेत बोलून त्यांच्या मनास लज्जा उत्पन्न होईल असे शब्द वापरत त्यांचा अपमान केला.
यावेळी आरोपीने इतर शासकीय कर्मचाऱ्यांना हाताने तसेच लाथाबुक्क्यांनी मारहाण करून शिवीगाळ केली आणि जीवे मारण्याची धमकी दिल्याचे फिर्यादीत नमूद करण्यात आले आहे. या प्रकरणी यवत पोलीस ठाण्यात विविध कलमान्वये गुन्हा दाखल करण्यात आला असून पुढील तपास पोलीस निरीक्षक संतोष तासगावकर यांच्या मार्गदर्शनाखाली पोलीस उपनिरीक्षक नंदिवाले करीत आहेत.
