दौंड : गणेशोत्सव २०२६ हा सण शांततेत आणि सुरळीतपणे पार पडावा तसेच परिसरातील कायदा व सुव्यवस्था अबाधित राहावी, यासाठी यवत पोलिसांनी सराईत गुन्हेगारांविरोधात कडक पावले उचलली आहेत. यवत पोलीस ठाण्यात रेकॉर्डवर असणाऱ्या तब्बल ३४ सराईत आरोपींवर हद्दपारीची कडक कारवाई करण्यात आली आहे.
गणेशोत्सवाच्या काळात नागरिकांच्या सुरक्षिततेला तसेच सार्वजनिक शांततेला बाधा पोहोचू नये, यासाठी यवत पोलीस ठाण्याच्या हद्दीतील सराईत गुन्हेगारांच्या हालचालींवर लक्ष ठेवण्यात आले. संबंधित आरोपींविरोधात यापूर्वी विविध गंभीर स्वरूपाचे गुन्हे दाखल असल्याचे पोलिसांनी नमूद केले आहे.
संबंधित आरोपींविरुद्ध हद्दपारीचे प्रस्ताव विशेष प्राधिकृत कार्यकारी दंडाधिकारी तसेच अपर पोलीस अधीक्षक, बारामती विभाग, पुणे ग्रामीण यांच्याकडे पाठविण्यात आले होते. प्रस्तावांची चौकशी करून मंजुरी मिळाल्यानंतर यवत पोलीस ठाण्याच्या अभिलेखावरील एकूण ३४ सराईत आरोपींवर हद्दपारीची कारवाई करण्यात आली आहे. यवत पोलीस ठाण्याच्या हद्दीत कोणत्याही प्रकारची गुंडगिरी, अवैध धंदे अथवा कायदा हातात घेण्याचा प्रयत्न करणाऱ्यांविरुद्ध यापुढेही अशाच प्रकारची कडक कारवाई केली जाईल, असा इशारा पोलिसांनी दिला आहे.
ही कारवाई पुणे ग्रामीणचे पोलीस अधीक्षक संदीपसिंग गिल, अपर पोलीस अधीक्षक गणेश बिरादार आणि उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, पोलीस उपनिरीक्षक मारोती मेतलवाड, अपर पोलीस अधीक्षक कार्यालयातील पोलीस उपनिरीक्षक पांडुरंग बनकर पोलीस हवालदार संदीप देवकर, महेंद्र चांदणे, रॉकी देवकाते, नवनाथ शेंडगे, पोलीस कॉन्स्टेबल अमोल भुजबळ, प्रतिक जगताप, मारुती बाराते, सचिन गुंड, धिरज जाधव, दिनेश लोणकर आणि विनीत कुर्हाडे यांच्या पथकाने केली आहे.
गणेशोत्सवाच्या काळात कायदा व सुव्यवस्था अबाधित ठेवण्यासाठी यवत पोलिसांकडून प्रतिबंधात्मक कारवाई अधिक तीव्र करण्यात आली असून, नागरिकांनी शांतता व सुव्यवस्था राखण्यासाठी पोलिसांना सहकार्य करण्याचे आवाहन करण्यात आले आहे.
