दौंड प्रतिनिधी : संपूर्ण राज्यात ओढवलेल्या दुष्काळ सदृश परिस्थितीच्या झळा आता दौंड तालुक्यालाही बसू लागल्या आहेत. त्यामुळे दौंड तालुक्यात निर्माण झालेल्या दुष्काळसदृश परिस्थितीचा आढावा घेण्यासाठी राज्याचे कृषीमंत्री दत्तात्रय भरणे यांनी भेट दिली. यावेळी त्यांनी दौंड तालुक्यातील देऊळगाव गाडा तसेच अन्य ठिकानांच्या पिक परिस्थितीची प्रत्यक्ष पाहणी करत सरकारकडून शेतकऱ्यांना मदत केली जाईल तसेच कर्नाटक सरकारपेक्षा जास्त मदत महाराष्ट्र सरकार शेतकऱ्यांना करेल असे आश्वासन दिले.
राज्यातील अनेक ठिकाणी पावसाने हुलकावणी दिल्यानंतर दुष्काळ सदृश परिस्थिती निर्माण झाली आहे त्यामुळे मुख्यमंत्री देवेंद्र फडणवीस, उपमुख्यमंत्री सुनेत्रा पवार, एकनाथ शिंदे यांनी दिलेल्या सूचनेनुसार राज्यभरातील सर्वच लोकप्रतिनिधी शेतकरी बांधवांच्या बांधावर जाऊन पाहणी करत आहेत. यावेळी दौंड तालुक्यात निर्माण झालेली दुष्काळसदृश परिस्थिती, पावसाचा खंड पडल्याने पिकांची झालेली अवस्था आणि शेतकऱ्यांसमोरील अडचणी यांचा आढावा यावेळी पाहणी दौऱ्यात घेण्यात आला आहे.
दुष्काळामुळे अडचणीत सापडलेल्या शेतकऱ्यांना शासनाच्या माध्यमातून तातडीने सर्व निकष बाजूला ठेवून आवश्यक ती मदत, सवलती व इतर शासकीय सुविधा मिळणे गरजेचे असल्याची मागणी होत आहे. दौंड तालुक्यातील देऊळगाव गाडा, खोर, पडवी कुसेगाव या भागावर कायम असलेले दुष्काळाचे सावट दूर करण्यासाठी जनाई – शिरसाई व पुरंदर उपसा सिंचन योजनांच्या माध्यमातून शेतकऱ्यांना पाणी उपलब्ध करून देण्यासाठी आम्ही सातत्याने प्रयत्नशील आहोत अशी माहिती आमदार राहुल कुल यांनी दिली तर माजी आमदार रमेश थोरात यांनी या भागातील विजेच्या समस्यांमुळे शेतकऱ्यांना मोठा त्रास सहन करावा लागत असल्याने शेतकऱ्यांना लोड शेडींगपासून मुक्त करण्यासाठी प्रयत्न करावे लागतील अशी मागणी मंत्री भरणे यांच्यासमोर केली.
या दौऱ्यावेळी कृषीमंत्री दत्तात्रय भरणे यांच्यासोबत आमदार राहुल कुल, माजी आमदार रमेश थोरात, यांसह विभागीय कृषी सहसंचालक, पुणे बाबासाहेब जेजुरकर, जिल्हा अधीक्षक कृषी अधिकारी वैभव तांबे, गट विकास अधिकारी अरुण मरभळ, तालुका कृषी अधिकारी अजिंक्य दुधाणे, नायब तहसीलदार श्रीमती ममता भंडारे तसेच विविध विभागांचे अधिकारी व कर्मचारी उपस्थित होते.
