दौंड : दौंड तालुक्यातील हातवळण गावच्या हद्दीत एका नवजात पुरुष जातीच्या बालकाचा मृतदेह आढळून आला आहे. ही धक्कादायक घटना मंगळवार दि. २२ सप्टेंबर रोजी सकाळी साडेसहा वाजण्याच्या सुमारास उघडकीस आली आहे. या गंभीर घटनेची नोंद यवत पोलीस ठाण्यात करण्यात आली आहे.
पोलिसांनी दिलेल्या माहितीनुसार, हातवळण गावातील आशिष सुरेश शिंदे यांच्या घरासमोर एक नवजात पुरुष जातीचे बालक पडलेले होते. याबाबतची माहिती आशिष शिंदे यांनी खबर देणार यांना फोनवरून दिली. त्यानंतर पोलिसांनी घटनास्थळी धाव घेत तेथील पाहणी केली असता या बालकाच्या शरीराचा मानेपासून पुढील भाग तसेच उजवा हात दिसून येत नसल्याचे त्यांनी माहितीमध्ये नमूद केले आहे.
त्यामुळे या अर्भकाच्या शरीराचे काही अवयव कुत्र्यांनी खाल्ले असावेत, अशी शक्यता व्यक्त करण्यात आली आहे. या घटनेबाबत संजय ज्ञानदेव म्हेत्रे (वय ५८, व्यवसाय शेती, रा. हातवळण, ता. दौंड, जि. पुणे) यांनी यवत पोलीस ठाण्यात खबर दिली असून बालकाबाबत गावात तसेच शेजारील गावांमध्ये चौकशी करण्यात येत आहे मात्र त्याच्या पालकांबाबत किंवा ओळखीबाबत अजूनतरी कोणतीही माहिती मिळाली नसल्याचे पोलिसांनी सांगितले आहे.
या प्रकरणी यवत पोलीस ठाण्यात अकस्मात मृत्यू अशी नोंद करण्यात आली आहे. या घटनेचा पुढील तपास यवत पोलीस ठाण्याचे पोलीस निरीक्षक संतोष तासगावकर यांच्या मार्गदर्शनाखाली सहाय्यक पोलीस निरीक्षक कदम करीत आहेत.
