दौंड ग्रामिण : यवत पोलिसांनी मोक्का व खंडणीसारख्या गंभीर गुन्ह्यांतील आरोपीकडून एक गावठी पिस्तूल व एक जिवंत काडतूस जप्त करून अटक करण्यात आली आहे. ही कारवाई बोरीभडक, (ता. दौंड) येथे करण्यात आली आहे.
दिनांक १७ सप्टेंबर २०२६ रोजी रात्री ११.४५ वाजता यवत पोलिसांना बोरीभडक रोडवर एक इसम विनापरवाना गावठी पिस्तूल बाळगून फिरत असल्याची गोपनीय माहिती मिळाली होती. पोलिस निरीक्षक संतोष तासगावकर यांना मिळालेल्या या माहितीच्या आधारे पोलिसांनी तात्काळ घटनास्थळी धाव घेतली.
यावेळी पोलिसांनी संशयित ऋषभ रमेश बडकेर (वय ३० वर्षे, रा. उरुळी कांचन, ता. हवेली, जि. पुणे) याला ताब्यात घेत त्याची झडती घेतली असता त्याच्याकडून एक गावठी पिस्तूल व एक जिवंत काडतूस असा अंदाजे २५ हजार ५०० रुपये किमतीचा मुद्देमाल मिळून आला.
जिल्हाधिकाऱ्यांच्या आदेशाचे उल्लंघन
पोलिसांच्या माहितीनुसार, संबंधित आरोपीविरुद्ध यापूर्वी पुणे शहर पोलिस आयुक्तालयाच्या हद्दीत एकूण १३ गुन्हे दाखल असल्याचे तपासात निष्पन्न झाले आहे. त्यामुळे त्याच्यावर प्रतिबंधात्मक कारवाई करण्यात आली होती. पुणे जिल्ह्यात शस्त्रास्त्रे, तलवारी, बंदुका आदी वस्तू बाळगण्यास बंदी असतानाही आरोपीने आदेशाचे उल्लंघन केल्याचे पोलिसांनी नमूद केले आहे. या प्रकरणी फिर्यादी पोलीस कॉ. धिरज जाधव यांनी दिलेल्या फिर्यादीवरून आरोपी ऋषभ रमेश बडकेर याच्याविरुद्ध भारतीय शस्त्र अधिनियम व विविध कलमान्वये यवत पोलीस ठाण्यात गुन्हा दाखल करण्यात आला आहे.
ही कारवाई पुणे ग्रामीणचे पोलीस अधीक्षक संदिपसिंग गिल, अपर पोलीस अधीक्षक गणेश बिरादार तसेच दौंड उपविभागाचे पोलीस अधिकारी बापूसाहेब दडस, स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, पोलीस उपनिरीक्षक मारुती मेतलवाड, पोलीस हवालदार रॉकी देवकाते, संदीप देवकर, महेंद्र चांदणे, पोलीस कॉन्स्टेबल धिरज जाधव, मारुती बाराते, अमोल भुजबळ, प्रतीक जगताप, सचिन गुंड, दिनेश लोणकर, विनीत कुऱ्हाडे यांच्या पथकाने केली आहे.
