दौंड प्रतिनिधी : विविध ठिकाणच्या मंडळांकडून गणरायाचे आगमन केले जात असताना यात आता शाळा आणि कॉलेजसुद्धा मागे राहिलेले नाहीत. वाखारी येथील श्री धनाजी शेळके कॉलेज ऑफ फार्मसी येथेही उत्साहपूर्ण वातावरणात गणरायाचे आगमन झाले असून या ठिकाणी भव्य अश्या गणेश मूर्तीची प्रतिष्ठापना करण्यात आली आहे.
गणरायाच्या आगमनापासूनच संपूर्ण महाविद्यालय परिसरात भक्तिमय आणि उत्साहाचे वातावरण निर्माण झाले असून विद्यार्थ्यांच्या उत्स्फूर्त सहभागामुळे गणेशोत्सवाच्या या मंगल सोहळ्याला विशेष रंगत प्राप्त झाली आहे. गणरायाच्या आगमनावेळी महाविद्यालय परिसरात ढोल-ताशांचा गजर आणि लेझीमच्या तालावर विद्यार्थ्यांचे आकर्षक नृत्य सादर करण्यात आले. ढोल-ताशांच्या निनादाने आणि लेझीमच्या सुंदर तालबद्ध सादरीकरणाने वातावरण भारावून गेले. विद्यार्थ्यांनी उत्साहाने सहभाग घेत गणरायाचे जल्लोषात स्वागत केले.
“गणपती बाप्पा मोरया, मंगलमूर्ती मोरया” च्या जयघोषाने संपूर्ण परिसर दुमदुमून गेला. या मंगलमय सोहळ्यास महाविद्यालयाचे अध्यक्ष धनाजी शेळके, उपाध्यक्ष परिक्षित शेळके, महाविद्यालयाच्या सर्वेसर्वा सौ. शोभाताई शेळके, सचिव मा. सौ. राधिकाताई शेळके, तसेच महाविद्यालयाचे प्राचार्य डॉ. विकास गडधे सर यांची प्रमुख उपस्थिती लाभली. मान्यवरांच्या उपस्थितीत गणरायाचे भक्तिभावाने स्वागत करण्यात आले. गणरायाच्या आगमनानंतर महाविद्यालयात विधिवत पूजा, मंत्रोच्चार आणि आरती करण्यात आली. उपस्थित मान्यवर, प्राध्यापकवर्ग, शिक्षकेतर कर्मचारी आणि विद्यार्थ्यांनी भक्तिभावाने श्री गणरायाचे दर्शन घेतले. या वेळी संपूर्ण वातावरणात आनंद, उत्साह आणि श्रद्धेचे सुंदर दर्शन घडले.
महाविद्यालयीन जीवनामध्ये विद्यार्थ्यांच्या शैक्षणिक विकासासोबतच त्यांच्या सांस्कृतिक व सामाजिक जडणघडणीला देखील महत्त्व दिले जाते. गणेशोत्सवासारख्या पारंपरिक उत्सवाच्या आयोजनातून विद्यार्थ्यांमध्ये संघभावना, शिस्त, नेतृत्वगुण, नियोजनकौशल्य, सामाजिक बांधिलकी आणि भारतीय संस्कृती व परंपरांविषयी आदर निर्माण होण्यास मदत होते. विद्यार्थ्यांनी एकत्रितपणे केलेल्या सहभागामुळे गणेशोत्सवाला विशेष उत्सवी स्वरूप प्राप्त झाले. गणरायाच्या आगमनाच्या निमित्ताने महाविद्यालय परिसराची आकर्षक सजावट करण्यात आली होती.
सजावट, ढोल-ताशा, लेझीम आणि भक्तिमय वातावरण यामुळे संपूर्ण महाविद्यालय परिसर गणेशमय झाला होता. विद्यार्थी आणि शिक्षकांच्या उत्साहामुळे हा सोहळा सर्वांसाठी आनंददायी आणि अविस्मरणीय ठरला.या संपूर्ण कार्यक्रमाचे नियोजन व आयोजन प्रो. अनुष्का हाके मॅडम आणि प्रो. ऋतुजा ताकवणे मॅडम यांनी केले. त्यांच्या मार्गदर्शनाखाली विद्यार्थ्यांनी उत्स्फूर्तपणे सहभाग घेत कार्यक्रम यशस्वी करण्यासाठी सहकार्य केले. महाविद्यालयातील शिक्षक, शिक्षकेतर कर्मचारी आणि विद्यार्थ्यांच्या सहकार्यामुळे श्री गणरायाची प्रतिष्ठापना अत्यंत उत्साहात, शिस्तबद्ध आणि भक्तिमय वातावरणात संपन्न झाली.
