केडगाव : ‘मावशी, साप आला!’ असे मोठ्याने सांगून वृद्ध महिलेला घाबरवत तिच्या गळ्यातील सोन्याचे दागिने जबरदस्तीने हिसकावून नेणाऱ्या आरोपीला यवत पोलिसांनी जेरबंद केले आहे. पोलिसांनी आरोपीकडून चोरीस गेलेले अंदाजे ६ ग्रॅम वजनाचे सोन्याचे मंगळसूत्र व काळ्या मण्यांची पोत, तसेच गुन्ह्यात वापरलेली होंडा शाईन मोटारसायकल असा एकूण सुमारे ९५ हजार रुपयांचा मुद्देमाल हस्तगत केला आहे.
ही घटना दापोडी गावच्या हद्दीतील गट क्रमांक ५९ मधील शेतजमिनीत घडली. ६५ वर्षीय सुनंदा बापू रुपनवर या शेतात ऊस पिकाची लागवड करून झाडाजवळ बसलेल्या असताना आरोपी सुमित ऊर्फ घाऱ्या साळुंखे व त्याचे दोन अनोळखी साथीदार मोटारसायकलवरून तेथे आले. त्यापैकी दोघांनी फिर्यादीजवळ जाऊन ‘मावशी, साप आला!’ असे मोठ्याने सांगून त्यांना घाबरवले. वृद्ध महिला घाबरून पळत असताना आरोपींनी त्यांचा पाठलाग केला. त्यानंतर त्यांच्या गळ्यातील सोन्याचे मंगळसूत्र व काळ्या मण्यांची पोत जबरदस्तीने हिसकावून घेत तिघेही मोटारसायकलवरून घटनास्थळावरून फरार झाले. याप्रकरणी यवत पोलीस ठाण्यात गुन्हा दाखल करण्यात आला होता.
गुन्ह्याचा तपास करताना यवत पोलिसांनी सीसीटीव्ही फुटेज, तांत्रिक विश्लेषण आणि कौशल्यपूर्ण तपासाच्या आधारे अल्पावधीत आरोपीचा शोध घेतला. पोलिसांनी सुमित ऊर्फ घाऱ्या ईश्वर साळुंखे (वय ३०, रा. बोरीपाधी, ता. दौंड, जि. पुणे) याला ताब्यात घेतले. त्याच्याकडून चोरीचे सोन्याचे दागिने आणि गुन्ह्यात वापरलेली होंडा शाईन मोटारसायकल असा सुमारे ९५ हजार रुपयांचा मुद्देमाल जप्त करण्यात आला. दरम्यान, गुन्ह्यातील अन्य दोन अनोळखी आरोपींचा शोध सुरू असून त्याबाबत पुढील तपास सुरू आहे. चोरीचा मुद्देमाल परत मिळाल्याने वृद्ध महिलेने यवत पोलिसांचे आभार मानले.
ही कारवाई पुणे ग्रामीणचे पोलीस अधीक्षक संदीपसिंग गिल, अपर पोलीस अधीक्षक, बारामती विभाग गणेश बिरादार आणि दौंड उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, सहाय्यक पोलीस निरीक्षक आबा गाढवे, पोलीस उपनिरीक्षक मारोती मेतलवाड, श्रेणी पोलीस उपनिरीक्षक बाळकृष्ण गाडेकर, पोलीस हवालदार रॉकी देवकाते, पोलीस हवालदार संदीप देवकर, पोलीस हवालदार अमोल काळे, पोलीस कॉन्स्टेबल धिरज जाधव, पोलीस कॉन्स्टेबल अमोल भुजबळ, पोलीस कॉन्स्टेबल सचिन गुंड, पोलीस कॉन्स्टेबल प्रतीक धिवार, पोलीस कॉन्स्टेबल प्रतीक जगताप, पोलीस कॉन्स्टेबल विकास मोरे, पोलीस कॉन्स्टेबल दिनेश लोणकर आणि पोलीस कॉन्स्टेबल विनित कु-हाडे यांच्या पथकाने केली असून गुन्ह्याचा पुढील तपास श्रेणी पोलीस उपनिरीक्षक बाळकृष्ण गाडेकर करीत आहेत.
