वेल्हे : वेल्हे पोलीस स्टेशनच्या हद्दीतील घेवंडे गावात फार्महाऊसच्या बांधकामासाठी आणून ठेवलेले सुमारे 58 हजार रुपये किमतीचे बांधकाम साहित्य अज्ञात चोरट्याने चोरून नेल्याची घटना घडली होती. याप्रकरणी वेल्हे पोलीस स्टेशनमध्ये गुन्हा दाखल करण्यात आला होता. या चोरीचा तपास करत पोलिसांनी एका सराईत चोरट्यास अटक केली असून, त्याच्याकडून चोरीचा मुद्देमाल हस्तगत करण्यात आला आहे. घेवंडे गावाच्या हद्दीत ॲड. सुरज ननवरे यांच्या फार्महाऊसचे बांधकाम सुरू असून, बांधकामासाठी आणून ठेवलेल्या साहित्यापैकी सुमारे 58 हजार रुपयांचे साहित्य चोरीस गेल्याचे निदर्शनास आले. याबाबत वेल्हे पोलीस स्टेशनमध्ये घरफोडी व चोरीचा गुन्हा दाखल करण्यात आला होता.
या गुन्ह्याचा तपास करताना वेल्हे पोलीस स्टेशनचे प्रभारी अधिकारी किशोर शेवते यांनी पोलिसांना स्वतंत्र पथक तयार करून चोरट्यांचा शोध घेण्याच्या सूचना दिल्या. त्यानुसार पोलीस उपनिरीक्षक देखमुख, पोलीस हवालदार गजानन खत्री, सोमेश राऊत, पोलीस अंमलदार युवराज सोमवंशी, बुद्धीवान मोरे, अजिंक्य बंडगर, आकाश पाटील, मयूर जगताप, अजय गार्डी, शुभम कदम, सोमनाथ जाधव आदींचे पथक तयार करण्यात आले. दि. 13 ऑगस्ट 2026 रोजी सायंकाळी 7 वाजता पथकाला घेवंडे गावामध्ये पुन्हा चोरी करण्याच्या उद्देशाने एक संशयित व्यक्ती फिरत असल्याची माहिती मिळाली. पोलिसांनी तत्काळ घेवंडे गावात पेट्रोलिंग सुरू केले. यावेळी गावातील नागरिक सागर देवगिरीकर, सराजुल अन्सारी, दिनानाथ प्रसाद, रामभाऊ जनकर आणि अनिकेत गायकवाड यांना संशईत पिकअप वाहन दोन-तीन वेळा चक्कर मारत असल्याचे आढळून आले.
नागरिकांनी पाठलाग करत तो पिकअप टेम्पोवरील ड्रायव्हरला पिकअप थांबविण्यास सांगितले मात्र तो न थांबता वेल्हे बाजूला पळून जाऊ लागला त्यावेळी याची माहिती पेट्रोलिंग करणाऱ्या पोलिसांना मिळाली त्यांनी नागरिकांच्या मदतीने संशयित पिकअपचा पाठलाग करत तो अडवला. यावेळी पिकअप मध्ये असलेले दोन चोरटे डोंगरात, झाडाझुडपातून पळून गेले. मात्र पिकअप टेम्पो व त्यावरील ड्रायव्हर रमेश बवन मरगळे यास पोलिसांनी ताब्यात घेतले.
पोलिसांनी केलेल्या चौकशीत चोरीच्या गुन्ह्याबाबत महत्त्वाची माहिती समोर आली असून, आरोपीकडून साडेतीन लाख रुपयांचा मुद्देमाल जप्त करण्यात आल्याचे पोलिसांनी सांगितले आहे. या प्रकरणातील इतर आरोपींचा शोध सुरू असून, आणखी गुन्हे उघडकीस येण्याची शक्यता पोलिसांनी व्यक्त केली आहे.
ही कारवाई पुणे ग्रामीणचे पोलीस अधीक्षक संदीप गिल, अपर पोलीस अधीक्षक डॉ. शुभम कुमार, हवेली विभागाचे उपविभागीय पोलीस अधिकारी सुनिलकुमार पुजारी आणि वेल्हे पोलीस स्टेशनचे सहाय्यक पोलीस निरीक्षक किशोर शेवते यांच्या मार्गदर्शनाखाली करण्यात आली. या कारवाईमध्ये पोलीस उपनिरीक्षक देखमुख, पोलीस हवालदार गजानन खत्री, सोमेश राऊत, पोलीस अंमलदार युवराज सोमवंशी, बुद्धीवान मोरे, अजिंक्य बंडगर, आकाश पाटील, मयूर जगताप, शुभम कदम आणि सोमनाथ जाधव यांनी सहभाग घेतला.
