केडगाव, दौंड : दौंड तालुक्यातील केडगाव येथील देशमुख मळा परिसरात अज्ञात व्यक्तीने शेतात तणनाशक फवारून उभ्या मेथी पिकाचे नुकसान केल्याची धक्कादायक घटना सोमवार दिनांक ऑगस्ट सकाळी उघडकीस आली आहे. या घटनेत शेतकरी विपुल गोरख शेळके यांच्या सुमारे एक एकर क्षेत्रावरील मेथी पिकाचे मोठे नुकसान झाले असून, त्यांना अंदाजे दीड लाख रुपयांचा आर्थिक फटका बसल्याचे त्यांनी सांगितले.
विपुल शेळके यांनी मेहनत घेऊन आपल्या शेतात मेथीचे पीक घेतले होते. पीक पूर्णपणे बहरले असून काढणीसाठी तयार झाले होते. सोमवारीच मेथीची काढणी करून ती बाजारपेठेत विक्रीसाठी नेण्याचे नियोजन होते. मात्र, काढणीच्या काही तास आधीच अज्ञात व्यक्तीने शेतात तणनाशकाची फवारणी केल्याने संपूर्ण उभे पीक खराब झाल्याचे निदर्शनास आले.
सकाळी शेतात गेल्यानंतर प्रकार उघड
सोमवारी सकाळी विपुल शेळके नेहमीप्रमाणे शेतात गेले असता मेथीच्या पिकाची अवस्था संशयास्पद दिसून आली. बारकाईने पाहणी केली असता पिकावर तणनाशकाची फवारणी झाल्याचे त्यांच्या लक्षात आले. त्यानंतर संपूर्ण शेताची पाहणी केली असता सुमारे एक एकर क्षेत्रातील मेथीचे पीक खराब झाल्याचे स्पष्ट झाले.
काढणीच्या टप्प्यावर आलेले पीक अचानक नष्ट झाल्याने शेळके कुटुंबाला मोठा आर्थिक धक्का बसला आहे. पीक घेण्यासाठी केलेला खर्च, गेल्या अनेक दिवसांची मेहनत आणि बाजारपेठेत विक्रीतून मिळणारे अपेक्षित उत्पन्न या सर्वांवर पाणी फिरले आहे.
शेतकऱ्यांमध्ये संतापाचे वातावरण
उभ्या पिकावर जाणूनबुजून तणनाशक फवारून नुकसान करण्याच्या या प्रकारामुळे देशमुख मळा परिसरातील शेतकऱ्यांमध्ये संतापाचे वातावरण निर्माण झाले आहे. शेतकरी मोठ्या खर्चातून आणि कष्टातून पीक उभे करतात. काढणीच्या अगोदरच पीक नष्ट झाल्यास शेतकऱ्यांचे मोठे आर्थिक नुकसान होते. हा प्रकार नेमका कोणी केला, याचा शोध घेऊन दोषींवर कठोर कारवाई करावी, अशी मागणी परिसरातील शेतकऱ्यांकडून करण्यात येत आहे.
केडगाव पोलीस चौकीत तक्रार
घटनेची माहिती मिळाल्यानंतर विपुल शेळके यांनी सोमवारी सकाळी केडगाव पोलीस चौकीत तक्रार देण्यासाठी हजेरी लावली. अज्ञात व्यक्तीने शेतात तणनाशक फवारून मेथी पिकाचे नुकसान केल्याचे त्यांनी पोलिसांना सांगितले असून, या घटनेची सखोल चौकशी करून संबंधित व्यक्तीवर कारवाई करण्याची मागणी केली आहे.
