इंदापूर : अखिल भारतीय मराठा महासंघाच्या इंदापूर तालुकाध्यक्षपदी बावडा येथील योगेश ओमराव घोगरे यांची नियुक्ती करण्यात आली आहे. तसेच तालुका उपाध्यक्षपदी संतोष जगताप (भोडणी) आणि तालुका सचिवपदी हरिभाऊ पुंडे (शेटफळ हवेली) यांची नियुक्ती करण्यात आली. पुणे जिल्हाध्यक्ष तुषार शेळके यांच्या हस्ते नवनियुक्त पदाधिकाऱ्यांना नियुक्तीपत्र प्रदान करण्यात आले.
यावेळी अखिल भारतीय मराठा महासंघाचे पुणे जिल्हा संपर्कप्रमुख रोहिदास राजपुरे तसेच इंदापूर तालुक्याचे विद्यमान केमिस्ट असोसिएशन ऑफ पुणे डिस्ट्रिक्टचे संघटक सचिव गणेश ठोंबरे उपस्थित होते. त्यांनी नवनियुक्त पदाधिकाऱ्यांचे अभिनंदन करून सामाजिक व संघटनात्मक कार्यासाठी शुभेच्छा दिल्या. तर मराठा महासंघाचे प्रदेशाध्यक्ष संभाजीराव दहातोंडे आणि प्रदेश उपाध्यक्ष अनिल ताडगे यांनी दूरध्वनीवरून नवनिर्वाचित पदाधिकाऱ्यांचे अभिनंदन करत शुभेच्छा दिल्या.
यावेळी ओमराव घोगरे, सचिन कोकाटे, सिद्धनाथ साळुंखे, सदाशिव कदम, संतोष पवार, संजय शिंदे, विशाल घाडगे, केशव घोगरे, अक्षय हेगडे, विशाल घोगरे, दत्ता गायकवाड, नवनाथ देवकाते व वेदांत घोगरे आदी मान्यवर उपस्थित होते. उपस्थितांनी योगेश घोगरे यांचे अभिनंदन करून त्यांच्या पुढील कार्यासाठी शुभेच्छा दिल्या.
गावागावांत संघटनेची बांधणी करण्याचा निर्धार
अखिल भारतीय मराठा महासंघ ही मराठा समाजाच्या सामाजिक हितासाठी कार्य करणारी जुनी व व्यापक संघटना असून, संघटनेमध्ये दर तीन वर्षांनी नवीन पदाधिकाऱ्यांची निवड केली जाते. संघटनेची विचारधारा व कार्य गावागावांत पोहोचवून समाजाला अधिक संघटित करण्यासाठी नवनियुक्त पदाधिकाऱ्यांनी प्रभावीपणे काम करावे, अशी अपेक्षा यावेळी व्यक्त करण्यात आली.
राष्ट्रीय अध्यक्ष दिलीप दादा जगताप यांच्या नेतृत्वाखाली अखिल भारतीय मराठा महासंघाच्या माध्यमातून समाजाच्या सर्वांगीण विकासासाठी विविध उपक्रम राबविण्यात येत आहेत. अण्णासाहेब पाटील आर्थिक विकास महामंडळ, सारथी आदी संस्थांच्या माध्यमातून शासनाच्या विविध योजना व सुविधांचा लाभ समाजातील तळागाळातील घटकांपर्यंत पोहोचविण्यासाठी प्रयत्न करण्याचा निर्धार यावेळी व्यक्त करण्यात आला.
युवक, विद्यार्थी, महिला आणि समाजातील विविध घटकांना जोडणार
बावडा गावातील कार्यकर्त्याला इंदापूर तालुकाध्यक्षपदाची संधी दिल्याबद्दल उपस्थितांनी अखिल भारतीय मराठा महासंघाचे आभार व्यक्त केले. इंदापूर तालुक्यातील गावागावांत संघटनेची मजबूत बांधणी करून युवक, विद्यार्थी, महिला तसेच समाजातील विविध घटकांना संघटनेशी जोडण्याबरोबरच समाजाच्या न्याय्य प्रश्नांसाठी प्रभावीपणे काम करण्याचा निर्धार यावेळी करण्यात आला. नवनियुक्त तालुकाध्यक्ष योगेश घोगरे यांनी संघटनेने आपल्यावर दाखविलेला विश्वास सार्थ ठरवून इंदापूर तालुक्यात अखिल भारतीय मराठा महासंघाचे कार्य अधिक व्यापक आणि प्रभावी करण्यासाठी प्रामाणिकपणे काम करण्याची ग्वाही दिली.
