पुणे : पुणे येथील एका व्यावसायिक खोदकाम कंत्राटदाराकडे १० लाख रुपयांच्या लाचेची मागणी केल्याप्रकरणी शिवाजीनगर तलाठी कार्यालयातील तलाठी आणि कोतवालाविरुद्ध लाचलुचपत प्रतिबंधक विभाग (एसीबी) ने गुन्हा दाखल केला आहे.
तक्रारदार हे ३७ वर्षीय खोदकाम कंत्राटदार असून त्यांनी पुण्यातील व्यावसायिक प्रकल्पाच्या इमारतीचा पाया खोदण्याचे काम केले होते. पंचनाम्यात ३२०० ब्रास जास्त खोदकाम झाल्याचे सांगून संबंधित पंचनाम्याचा अहवाल तहसीलदारांकडे अनुकूलरित्या सादर करण्यासाठी तलाठी आश्विनी दत्तात्रय कोकोटे (वय ३७) यांच्या वतीने कोतवाल महेश मधुकर मुंडे (वय ३०) यांनी १० लाख रुपयांच्या लाचेची मागणी केल्याची तक्रार एसीबीकडे करण्यात आली.
एसीबीने १६ जून २०२६ रोजी तक्रारीची पडताळणी केली असता, कोतवाल महेश मुंडे यांनी तलाठींच्या वतीने लाचेची मागणी केल्याचे तसेच तलाठी आश्विनी कोकोटे यांनी ती रक्कम स्वीकारण्याची तयारी दर्शवून लाच मागणीस प्रोत्साहन दिल्याचे निष्पन्न झाले. या प्रकरणी शिवाजीनगर पोलीस स्टेशन येथे गुन्हा क्रमांक २०५/२०२६ दाखल करण्यात आला असून, भ्रष्टाचार प्रतिबंधक अधिनियम १९८८ च्या कलम ७ व १२ अन्वये मंगळवारी ४ ऑगस्ट रोजी सायंकाळी ४.३३ वाजता गुन्हा नोंदविण्यात आला आहे.
या कारवाईचे नेतृत्व पोलीस निरीक्षक आसावरी शेडगे यांनी केले. त्यांच्या मार्गदर्शनाखालील पथकाने ही कारवाई केली असून, पोलीस अधीक्षक शिरीष सरदेशपांडे व अपर पोलीस अधीक्षक अजित पाटील यांच्या मार्गदर्शनाखाली तपास सुरू आहे.
