केडगाव, प्रतिनिधी : दौंड तालुक्यातील केडगाव येथील मोहितेमळा परिसरातील शेतातून सुमारे अडीच लाख किमतीचा तयार डाळिंबाचा माल अज्ञात चोरट्यांनी लंपास केल्याची धक्कादायक घटना उघडकीस आली आहे. या प्रकरणी शेतकरी जालिंदर बाजीराव शेळके (वय ६०, रा. मोहितेमळा, केडगाव, ता. दौंड) यांनी केडगाव पोलीस ठाण्यात फिर्याद दिली असून अज्ञात चोरट्यांविरुद्ध गुन्हा दाखल करण्यात आला आहे.
मिळालेल्या माहितीनुसार, जलिंदर शेळके यांची मोहितेमळा येथील गट क्रमांक ५३ मध्ये नऊ एकर शेती असून त्यापैकी चार एकर क्षेत्रात डाळिंबाची लागवड करण्यात आली आहे. शुक्रवारी (३१ जुलै) रात्री सुमारे ११ वाजण्याच्या सुमारास त्यांनी मुलगा सागर याच्यासह डाळिंब बागेची पाहणी केली असता सर्व माल सुरक्षित असल्याचे दिसून आले.
मात्र शनिवारी (१ ऑगस्ट) सकाळी ७ वाजता पुन्हा बागेची पाहणी करण्यासाठी गेल्यानंतर झाडांवरील तयार डाळिंबे गायब झाल्याचे त्यांच्या निदर्शनास आले. परिसरात शोधाशोध व चौकशी करूनही कोणतीही माहिती मिळाली नसल्याने अज्ञात चोरट्यांनी रात्रीच्या अंधाराचा फायदा घेत डाळिंबाची चोरी केल्याचा संशय व्यक्त करण्यात आला आहे.
शेळके यांनी दिलेल्या फिर्यादीनुसार, सुमारे २,५०० किलो तयार डाळिंबाचा माल चोरीस गेला असून त्याची अंदाजे किंमत अडीच लाख इतकी आहे. ही चोरी ३१ जुलै रात्री ११ ते १ ऑगस्ट सकाळी ७ या कालावधीत झाल्याचा अंदाज व्यक्त करण्यात आला आहे. या घटनेमुळे परिसरातील डाळिंब उत्पादक शेतकऱ्यांमध्ये चिंतेचे वातावरण निर्माण झाले आहे. या घटनेचा पुढील तपास पोलीस हवालदार जगताप हे करीत आहेत.
