केडगाव : भारतीय संस्कृतीमध्ये गुरुचे स्थान सर्वोच्च मानले जाते. विद्यार्थ्यांच्या जीवनाला योग्य दिशा देणारे, ज्ञानाचा प्रकाश देणारे आणि उत्तम संस्कार घडविणारे गुरुजनांप्रती कृतज्ञता व्यक्त करण्यासाठी वाखारी (ता.दौंड) येथील श्री धनाजी शेळके कॉलेज ऑफ फार्मसीमध्ये गुरुपौर्णिमा उत्साहपूर्ण, भक्तिमय आणि आनंददायी वातावरणात साजरी करण्यात आली.
गुरुपौर्णिमेनिमित्त महाविद्यालय परिसरात आकर्षक सजावट करण्यात आली होती. या कार्यक्रमास संस्थेचे अध्यक्ष श्री. धनाजी शेळके, सचिव सौ. राधिका शेळके तसेच महाविद्यालयाचे उपप्राचार्य डॉ. विकास गडधे यांची प्रमुख उपस्थिती लाभली तर विद्यार्थ्यांनी मान्यवरांचे पुष्पगुच्छ देऊन स्वागत केले.
सचिव सौ. राधिका शेळके यांनी गुरुपौर्णिमेचे महत्त्व स्पष्ट करताना गुरु हा विद्यार्थ्यांच्या आयुष्याला दिशा देणारा दीपस्तंभ असल्याचे सांगितले. विद्यार्थ्यांनी गुरुजनांचा आदर राखत प्रामाणिकपणे शिक्षण घ्यावे, शिस्तीचे पालन करावे आणि समाजासाठी आदर्श नागरिक बनावे, असा प्रेरणादायी संदेश त्यांनी दिला. यानंतर विद्यार्थ्यांनी नृत्य, गायन, अभिनय आणि मनोगत अशा विविध सांस्कृतिक कार्यक्रमांद्वारे गुरुजनांप्रती आदर व कृतज्ञता व्यक्त केली. उपस्थितांनी विद्यार्थ्यांच्या सादरीकरणाचे कौतुक केले.
उपप्राचार्य डॉ. विकास गडधे यांनी विद्यार्थ्यांना मार्गदर्शन करताना जीवनात यशस्वी होण्यासाठी गुरुंचे मार्गदर्शन, आई-वडिलांचे आशीर्वाद आणि स्वतःची मेहनत या तीन गोष्टी अत्यंत आवश्यक असल्याचे सांगितले. कार्यक्रमाच्या शेवटी आभार प्रदर्शन करण्यात आले. संपूर्ण कार्यक्रमाचे नियोजन प्रा. ऋतुजा ताकवणे आणि प्रा. अनुष्का हाके यांच्या मार्गदर्शनाखाली यशस्वीपणे पार पडले. गुरुपौर्णिमेच्या निमित्ताने गुरु-शिष्य नात्याचे महत्त्व अधोरेखित करणारा हा सोहळा सर्वांच्या स्मरणात राहणारा ठरला.
