दौंड : दौंड तालुक्यातील सहजपूर येथे सोलापूर–पुणे राष्ट्रीय महामार्गावर बुधवारी दि. २९ जुलै रोजी रात्री भीषण अपघात होऊन दुचाकीवरील दोघांचा मृत्यू झाला. या प्रकरणी यवत पोलीस ठाण्यात थार वाहन चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सहजपूर गावाच्या हद्दीत प्रिन्स हॉटेलसमोर रात्री सुमारे ८.३० वाजण्याच्या सुमारास हा अपघात झाला. आरोपी चालकाने महिंद्रा थार (क्र. MH 14 KJ 2288) हे वाहन भरधाव व निष्काळजीपणे चालवित असताना वाहनावरील नियंत्रण सुटले. त्यानंतर थारने पुढे जात असलेल्या हिरो स्प्लेंडर दुचाकीला (क्र. MH 25 BH 5366) पाठीमागून जोरदार धडक दिली.
या भीषण धडकेत दुचाकीवरील अशोक भास्कर नाईकनवरे (वय ३०, रा. येणेगाव, ता. परांडा, जि. धाराशिव) आणि बालाजी भास्कर कोचाळे (वय ४३, रा. जवळा (निजाम), ता. परांडा, जि. धाराशिव) यांचा गंभीर दुखापतीमुळे मृत्यू झाला. अपघातात दोन्ही वाहनांचेही मोठे नुकसान झाले.
या प्रकरणी फिर्यादी आश्रकांत भास्कर नाईकनवरे यांच्या तक्रारीवरून यवत पोलीस ठाण्यात गुन्हा दाखल करण्यात आला आहे. पोलीस निरीक्षक संतोष तासगावकर यांच्या मार्गदर्शनाखाली पोलिस उपनिरीक्षक मोरे या प्रकरणाचा पुढील तपास करीत आहेत.
