दौंड | प्रतिनिधी
दौंड तालुक्यातील मौजे खुटबाव येथे दरोडा टाकण्याच्या तयारीत असलेल्या आंतरजिल्हा टोळीवर पुणे ग्रामीण पोलिसांच्या स्थानिक गुन्हे शाखा आणि यवत पोलीस स्टेशन यांनी संयुक्त कारवाई करत पाच आरोपींसह एका विधिसंघर्षित बालकाला ताब्यात घेतले. आरोपींकडून दोन लोखंडी कोयते, लोखंडी गज, मिरची पावडरचे पाकीट, दोरी व अन्य साहित्य जप्त करण्यात आले असून याप्रकरणी यवत पोलीस स्टेशन येथे गुन्हा दाखल करण्यात आला आहे.
पुणे ग्रामीण जिल्ह्यातील दुर्गम व एकांत वस्त्यांमध्ये जबरी चोरी व घरफोडीच्या घटनांमध्ये वाढ होत असल्याने पोलीस अधीक्षक संदीप सिंह गिल यांनी स्थानिक गुन्हे शाखेला विशेष सूचना दिल्या होत्या. त्यानुसार पोलीस निरीक्षक प्रमोद क्षीरसागर यांच्या नेतृत्वाखाली विशेष पथक तयार करण्यात आले. २७ जुलै २०२६ रोजी स्थानिक गुन्हे शाखेचे पथक यवत पोलीस स्टेशन हद्दीत पेट्रोलिंग करत असताना पोलीस अंमलदार विकास कापरे यांना मिळालेल्या गोपनीय माहितीनुसार खुटबाव येथील साळोबावस्ती परिसरात ५ ते ६ जण दरोडा टाकण्याच्या तयारीत असल्याचे समोर आले.
या माहितीची तात्काळ दखल घेत पोलीस निरीक्षक प्रमोद क्षीरसागर तसेच यवत पोलीस स्टेशनचे पोलीस निरीक्षक संतोष तासगावकर यांना माहिती देण्यात आली. त्यानंतर पोलीस उपनिरीक्षक बाळकृष्ण गाडेकर, पोलीस हवालदार महेंद्र चांदणे आणि पोलीस अंमलदार मारुती बाराटे यांच्यासह संयुक्त पथकाने घटनास्थळी सापळा रचला. पोलिसांची चाहूल लागताच संशयितांनी पळून जाण्याचा प्रयत्न केला; मात्र पोलिसांनी पाठलाग करून पाच आरोपी आणि एका विधिसंघर्षित बालकाला ताब्यात घेतले.
आरोपींकडून दरोड्यासाठी वापरण्यात येणारे दोन लोखंडी कोयते, लोखंडी गज, मिरची पावडरचे पाकीट, दोरी आदी साहित्य जप्त करण्यात आले. याप्रकरणी यवत पोलीस स्टेशन गुन्हा रजिस्टर क्रमांक ७५१/२०२६ अन्वये भारतीय न्याय संहिता २०२३ चे कलम ३१०(४) तसेच भारतीय हत्यार कायद्यान्वये गुन्हा दाखल करण्यात आला असून आरोपींना न्यायालयात हजर करण्यात आले आहे.
ही कारवाई पोलीस अधीक्षक संदीप सिंह गिल, अपर पोलीस अधीक्षक गणेश बिरादार (बारामती विभाग) आणि उपविभागीय पोलीस अधिकारी बापूराव दडस (दौंड विभाग) यांच्या मार्गदर्शनाखाली पार पडली.
कारवाईत स्थानिक गुन्हे शाखेचे पोलीस निरीक्षक प्रमोद क्षीरसागर, यवत पोलीस स्टेशनचे पोलीस निरीक्षक संतोष तासगावकर, पोलीस उपनिरीक्षक ज्ञानेश्वर राऊत, पोलीस अंमलदार सचिन घाडगे, आसिफ शेख, गुरुनाथ गायकवाड, सुभाष राऊत, योगेश नागरगोजे, विकास कापरे, यवत पोलीस स्टेशनचे पोलीस उपनिरीक्षक अक्षय मोरे, सहाय्यक पोलीस उपनिरीक्षक बाळकृष्ण गाडेकर, पोलीस अंमलदार महेंद्र चांदणे, प्रमोद गायकवाड, मारुती बाराटे आणि मोहन भानवसे यांनी सहभाग घेतला. पुढील तपास स्थानिक गुन्हे शाखा व यवत पोलीस स्टेशन करीत आहेत.
