बारामती : बारामती तालुक्यातील सुपे–चौफुला मार्गावर असणाऱ्या अहिल्यादेवी चौकात एक मालवाहू ट्रक आणि दुचाकीचा भीषण अपघात होऊन यामध्ये दुचाकीवर असणाऱ्या दोन सख्ख्या भावांचा मृत्यू झाला आहे. रविवारी दुपारी २ वाजता घडलेल्या या घटनेने सुपे परिसर हादरला आहे. मिळालेल्या माहितीनुसार हे दोन्ही भाऊ मोरगाव येथून दुचाकीवर सुपा येथील घराकडे जात असताना हा भीषण अपघात घडला.
सोमनाथ दत्तात्रय ठोंबरे (रा.शेंडगेवाडा, सुपे, ता. बारामती) व शुभम दत्तात्रय ठोंबरे (रा.शेंडगेवाडा, सुपे, ता. बारामती) अशी अपघातामध्ये मृत्यूमुखी पडलेल्या दोन भावांची नावे आहेत. अपघात झाला तेव्हा सोमनाथ हा जागीच ठार झाला तर शुभम गंभीर जखमी झाल्याने त्याला पुढील उपचारासाठी तातडीने लोणी काळभोर येथील नामांकित हॉस्पिटलमध्ये भर्ती करण्यात आले. मात्र उपचार सुरू असताना त्याचाही मृत्यू झाला.
असा झाला अपघात – हे दोन्ही भाऊ ज्यावेळी मोरगाव येथून दुचाकी क्र. एमएच ४२ ई १८७८ वरून सुपे येथील आपल्या घराकडे निघाले त्यावेळी अहिल्याबाई चौकातून पुढे वळणावर जात असताना त्यांची दुचाकी घसरली आणि सामोरून येणाऱ्या मालवाहू ट्रक क्र.एमएच १० सीआर ४१९९ च्या चाकाखाली गेली. या अपघातात सोमनाथ ठोंबरे याचा जागीच मृत्यू झाला तर शुभम ठोंबरे याचा हॉस्पिटलमध्ये उपचार सुरु असताना मृत्यू झाला. या घटनेचा पुढील तपास सुपा पोलीस करीत आहेत.
