दौंड : दौंड तालुक्यातील खुटबाव येथे दि.३१/०७/२०२० रोजी दुहेरी हत्याकांडाची घटना घडली होती. या दुहेरी हत्येप्रकरणी आरोपी प्रमोद उर्फ पप्पू अंकुश पवार उर्फ मंगेश अरुण जाधव, (रा.सद्गुरू कॉलनी, वाकड रोड,ता. हवेली, जि.पुणे) याला यवत पोलिसांनी अटक केली होती. त्याने केलेल्या दुहेरी हत्ये प्रकरणी आता त्याला अपर, जिल्हा सत्र न्यायालय, बारामती यांनी जन्मठिपेची शिक्षा सुनावली आहे.
सदर आरोपीने त्याची पत्नी मनिषा उर्फ हनिबाई उर्फ आशीबाई मंगेश जाधव आणि दिपक वाघमारे (रा.भोर.जि.पुणे) यांचा लोखंडी कोयता व लाकडी काठीने हल्ला करून त्यांचा निर्घृण खून केला होता. या प्रकरणी यवत पोलीस स्टेशन येथे भा.दं.वि.कलम ३०२ प्रमाणे गुन्हा दाखल करण्यात आला होता. सदर गुन्ह्याचा तपास तत्कालीन पोलीस निरीक्षक बी.एन. पाटील यांनी अत्यंत कसोशीने करून आरोपीविरुद्ध भक्कम व सबळ पुरावे संकलित केले होते.
या दुहेरी खुनाचा तपास पूर्ण करून न्यायालयात दोषारोपपत्र दाखल करण्यात आले होते. त्या अनुषंगाने दि.०२/०७/२०२६ रोजी सदर खटल्याची सुनावणी मा.अपर व जिल्हा सत्र न्यायालय, बारामती येथे घेण्यात आली. त्यामध्ये मा. न्यायालयाने उपलब्ध पुरावे, साक्षीदारांचे जबाब व सरकार पक्षाने सादर केलेल्या युक्तिवादाचा विचार करून आरोपी प्रमोद उर्फ पप्पू अंकुश पवार उर्फ मंगेश अरुण जाधव यास दोषी ठरवून मा.न्यायालयाने आरोपीस जन्मठेप व ५ हजार रुपयांचा दंड अशी शिक्षा सुनावली आहे. सरकारी अभियोक्ता सुनील वसेकर यांनी प्रभावीपणे खटल्याचे कामकाज चालवून यशस्वी युक्तिवाद केला.
सदर खटल्यात यवत पोलीस स्टेशन प्रभारी अधिकारी पोलीस निरीक्षक संतोष तासगांवकर, केस अधिकारी पोलीस उपनिरीक्षक सागर माने, जिल्हा न्यायालय पैरवी अधिकारी पोलीस उपनिरीक्षक एस.एस. सोळसकर, न्यायालय पैरवी अधिकारी सहाय्यक पोलीस उपनिरीक्षक गोरख कसपटे, सहाय्यक फौजदार ए.जे. कवडे, समन्स अंमलबजावणी करणारे पोलीस हवालदार अतूल राउत, पोलीस कॉ. अनिल माने, इंद्रजीत वाळुंज, वॉरंट अंमलबजावणी करणारे पोलीस हवालदार धनराज कुंभार, तसेच न्यायालय अंमलदार पोलीस हवालदार वेणुनाद टी. ढोपरे यांनी सदर खटल्याचे कामकाज प्रभावीपणे पाहिले.
