दौंड : दौंड तालुक्यातील कुरकुंभ एमआयडीसी येथे संशयास्पदरीत्या रासायनिक पदार्थाच्या टाक्या वाहतूक करताना एक ट्रक पकडण्यात आला असून ट्रक चालक प्रकाश महादू साळवे या ट्रक चालकावर दौंड पोलीस स्टेशन येथे भा.न्या.सं. कलम 286, 287, मोटार वाहन कायदा 1988 चे कलम 190(3), केंद्रीय मोटार वाहन नियम 1989 चे नियम 129, 130, 137 तसेच पर्यावरण संरक्षण कायदा, 1986 चे कलम 15 नुसार गुन्हा दाखल करण्यात आला असून याबाबत अंकुश कृष्णा दळवी (पोलीस शिपाई, दौंड पोलीस स्टेशन) यांनी फिर्याद दिली आहे.
मिळालेल्या माहितीनुसार दि.30/06/2026 रोजी सायंकाळी 4.30 वाजता पोलिस पथक हे गोपनीय माहितीच्या आधारे कुरकुंभ एमआयडीसी परिसरात पेट्रोलिंग करत असताना त्यांना टाटा ट्रक क्र. MH-12-HD-5106 हा संशयास्पदरीत्या रासायनिक पदार्थाच्या टाक्या वाहतूक करताना आढळून आला. पोलिसांनी हे वाहन थांबवून चौकशी केली असता ट्रक चालक प्रकाश साळवे याने सदर टाक्यांमध्ये मिक्स सॉल्व्हेंट (Mix Solvent) असून ते त्रिमूर्ती फार्मा (TRIMURTI PHARMA) कुरकुंभ एमआयडीसी येथून बाहेर आणल्याचे सांगितले.
मात्र, त्याला धोकादायक रसायनाच्या वाहतुकीसाठी आवश्यक असलेली महाराष्ट्र प्रदूषण नियंत्रण मंडळाची (MPCB) परवानगी, वाहतूक कागदपत्रे किंवा इतर आवश्यक वैध कागदपत्रे सादर करता आली नाहीत. तसेच धोकादायक रसायनाची वाहतूक केंद्रीय मोटार वाहन नियमांनुसार आवश्यक सुरक्षा उपाय व नियमानुसार न करता पर्यावरणास व मानवी आरोग्यास धोका निर्माण होईल अशा प्रकारे बेकायदेशीर वाहतूक केल्याचे निदर्शनास आल्याने वरील आरोपीविरुद्ध गुन्हा दाखल करण्यात आला.
घटनेचा पुढील तपास पोलिस निरीक्षक हेमंत शेडगे यांच्या मार्गदर्शनाखाली पोलिस हवालदार नगरे हे करीत आहेत.
