केडगाव, दौंड : रविवार दि. २८/०६/२६ रोजी प्राथमिक आरोग्य केंद्र केडगांव (ता. दौंड जि.पुणे) येथे राष्ट्रीय पल्स पोलिओ मोहिमेअंतर्गत ० ते ५ वर्ष वयोगटातील ९५.२ टक्के म्हणजेच ५,१५४ बालकांना पोलिओ प्रतिबंधक लस देण्यात आली. या मोहिमेसाठी पंचायत समिति सदस्य धनंजय शेळके, सरपंच पूनम बारवकर व जन आरोग्य समिति सदस्य डॉ.विश्वनाथ मोहन आदि मान्यवर उपस्थित होते.
या लसीकरण मोहिमेमध्ये लसीकरण बुथ ३०, ट्रांझिट टीम (पथके) : ०३, मोबाईल पथक : ०१,
तसेच ९२ कर्मचारी कार्यरत होते. या वर्षी केडगाव, चौफुला येथे राज्य परिवहन मंडळाच्या अधिकृत थांब्यावर विशेष बूथ चे नियोजन करण्यात आले होते. या बूथवर प्रवासात असलेल्या ० ते ५ वर्षे वयोगटातील बालकांना प्रत्येक बसमध्ये चौकशी करून पोलिओ डोस दिले जात होते. तसेच या बूथचा लाभ चारचाकी वाहनाने प्रवास करणाऱ्या काही बालकांनाही मिळाला. चौफुला येथील बस थांबा बूथवर १२१ बालकांना पोलिओ डोस देण्यात आले.
एकही बालक वंचित राहू नये म्हणून ‘विशेष नियोजन’ आता घरोघरी जाऊन लसीकरण : जी बालके रविवारी बुथवर येऊ शकली नाहीत, त्यांच्यासाठी मोहीम संपल्यानंतर विशेष गृहभेट सत्र राबवले जाणार आहे. प्राथमिक आरोग्य केंद्र कार्यक्षेत्रात पुढील ३ दिवस दिनांक ३० जून, १ जुलै व २ जुलै रोजी आरोग्य कर्मचारी घरोघरी जाऊन वंचित बालकांना पोलिओचे डोस देणार आहेत. सदर मोहिमेमध्ये डॉ. उज्वला जाधव, (तालुका वैद्यकीय अधिकारी) व डॉ. निलिमा लोखंडे (वैद्यकिय अधिकारी प्राथमिक आरोग्य केंद्र केडगांव) यांच्या मार्गदर्शनाखाली सर्व समुदाय आरोग्य अधिकारी, आरोग्य सहाय्यक (महिला व पुरुष), आरोग्य सेवक (महिला व पुरुष), आशा गट प्रवर्तक, सर्व आशा स्वयंसेविका, अंगणवाडी सेविका, ॲम्ब्युलन्स चालक व सर्व स्टाफने उस्फूर्त सहभाग नोंदवला.
