केडगाव, दौंड : दौंड तालुक्यातील केडगाव येथे एका ४२ वर्षीय तरुणाने आजारपणाला कंटाळून गळफास घेत आत्महत्या केली आहे. नितिन पांडुरंग शिंगाडे (वय,४२, रा. गरदडे गल्ली, केडगाव ता.दौंड,जि.पुणे) असे या तरुणाचे नाव असून याबाबतची खबर मयत नितीन यांचे भाऊ नवनाथ पांडुरंग शिंगाडे यांनी यवत पोलिसांना दिली आहे.
नवनाथ शिंगाडे यांनी दिलेल्या खबरीनुसार नितीन शिंगाडे हे गेल्या एक वर्षापासून आजारी होते. दि.२७ जून रोजी ते घरातून कोणाला काहीएक न सांगता निघून गेले होते. त्यांची विविध ठिकाणी शोधाशोध करण्यात येत होती. नितीन यांचा शोध घेत असताना त्याच रात्री ९:४५ च्या सुमारास बोरिपार्धी येथील इरिगेशन कॉलनीतील एका पडीक खोलीमध्ये नितीन शिंगाडे हे गळफास घेतलेल्या अवस्थेत आढळून आले.
नितीन शिंगाडे हे हसतमुख, मितभाषी आणि सर्वांसोबत आदराने वागणारे व्यक्तिमत्व होते. त्यांनी घेतलेल्या टोकाच्या निर्णयामुळे सर्वत्र हळहळ व्यक्त केली जात आहे. या घटनेचा पुढील तपास यवतचे पोलिस निरीक्षक संतोष तासगावकर यांच्या मार्गदर्शनाखाली पोलीस हवालदार किशोर मोहिते हे करीत आहेत.
