दौंड : दौंडमध्ये अवैधरित्या गॅस सिलेंडर वितरण करु पाहणाऱ्या एका वाहनाला पकडून त्यामध्ये असलेले ५६ गॅस सिलेंडर व वाहतूक करणारे वाहन दौंड पोलिसांकडून जप्त करण्यात आले आहे. दि. २६ जून रोजी मध्यरात्री नाकाबंदी करत असताना पोलिसांनी ही कारवाई केली आहे. दौंड, पाटस, काष्टी रोडवर असणाऱ्या दौंडच्या नगर मोरी चौकात रात्री उशीरा ही कारवाई करण्यात आली.
मिळत असलेल्या माहितीनुसार हे सुपर कॅरी नावाच्या वाहतूक सेगमेंट मधील या वाहनातून अनधिकृतरीत्या हॉटेल्स चालकांना हे घरगुती वापराचे सिलिंडर पोहोच केले जायचे असा संशय व्यक्त केला जात आहे. दररोज प्रमाणे आजही हा पुरवठा केला जाणार होता मात्र हा पुरवठा करण्याअगोदरच दौंड पोलिसांनी कारवाई करत हे सिलेंडर आणि वाहन जप्त केले आहे.
या कारवाईत दौंड पोलिसांनी सुमारे ५६ गॅस सिलिंडर आणि अंदाजे चार लाख रूपये किंमतीचा सुपर कॅरी नावाचे वाहन जप्त केले आहे. पोलिसांनी हे गॅस सिलेंडर घेऊन जाणारे वाहन पकडल्यानंतर दौंड तहसीलच्या पुरवठा निरीक्षकांनी पंचनामा केला आहे.
या प्रकरणी दौंड पोलिस ठाण्यातील अंमलदार अर्जुन पांडुरंग नरळे यांनी फिर्याद दिली असून वाहनचालक चंद्रशेखर शंकरराव चव्हाण (वय ३५, रा. मुंढेकरवाडी, ता. श्रीगोंदा, अहिल्यानगर) याच्यावर जीवनावश्यक वस्तू अधिनियम १९५५ आणि एलपीजी ( पुरवठा व वितरण नियमन) अधिनियमातील विविध कलमान्वये गुन्हा दाखल करण्यात आला आहे.
