दौंड : पुणे ग्रामिणमध्ये सध्या अवैध गावठी पिस्टल बाळगणाऱ्यांची संख्या दिवसेंदिवस वाढत चालली आहे. याला आळा घालण्यासाठी आता पुणे ग्रामिण पोलिसांनीही कंबर कसली असून यवत पोलिस ठाण्याने अश्या आरोपिंची माहिती घेऊन अटक सत्र सुरु केले आहे.
यवत पोलिस ठाण्याच्या हद्दीत आरोपी आदित्य सर्जेराव सांगळे (वय २१, रा.पाटस, ता.दौंड) हा गावठी पिस्टल घेऊन भुलेश्वर फाटा ते भुलेश्वर मंदिराकडे जाणाऱ्या रस्त्यावर फिरत असल्याची गोपनीय माहिती यवत पोलिसांना मिळाली. त्यानंतर यवत पोलिसांनी तात्काळ घटनास्थळी जाऊन खात्री केली असता आदित्य सर्जेराव सांगळे हा युवक विनापरवाना, बेकायदेशीररित्या एक गावठी पिस्टल जवळ बाळगताना मिळून आला. पोलिसांनी त्याच्याकडून सदर गावठी पिस्टल जप्त करत त्याला अटक करण्यात आली.
याप्रकरणी पोलिस हवालदार संदिप सुरेश देवकर यांनी फिर्याद दिली असून त्यांनी दिलेल्या फिर्यादीवरून आरोपी आदित्य सर्जेराव सांगळे याच्याविरुद्ध भारतीय अधिनियम १९५९ चे कलम ३,२५ तसेच महाराष्ट्र पोलीस अधिनियम शस्त्र १९५१ चे कलम ३७(१), (३) सह १३५ प्रमाणे यवत पोलीस स्टेशन येथे गुन्हा दाखल करण्यात आला आहे. सदर गुन्ह्याचा पुढील तपास यवत पोलीस स्टेशनचे पोलीस उपनिरीक्षक मारोती मेतलवाड हे करीत आहेत.
सदरची कारवाई पुणे ग्रामिण चे पोलीस अधिक्षक संदिपसिंह गिल, पुणे ग्रामीण अपर पोलीस अधीक्षक गणेश बिरादार, बारामती विभाग तसेच उपविभागीय पोलीस अधिकारी बापुराव दडस (दौंड विभाग) यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगांवकर, पोलीस उपनिरीक्षक मारोती मेतलवाड, पोलिस हवालदार रॉकी देवकाते, संदिप देवकर, गणेश कर्चे, महेंद्र चांदणे, पोलिस कॉन्स्टेबल धिरज जाधव, मारुती बाराते, अमोल भुजबळ, सचिन गुंड व मोहन भानवसे यांच्या पथकाने केली आहे.
