अब्बास शेख
केडगाव (दौंड) : दौंड तालुक्यात खळबळ माजवून देणाऱ्या केडगाव गर्भलिंग निदान प्रकरणात आता ‘एसआयटी’ आणि यवत पोलिसांच्या गळाला मोठा मासा लागला आहे. एसआयटी आणि यवत पोलिस स्त्री-भ्रूणहत्या रॅकेटचा पर्दाफाश करत असताना बेकायदेशीर लिंग निदान करणाऱ्या सदिच्छा शिंदे हिला अटक करण्यात आली आहे. तोतया डॉक्टर अण्णासाहेब गिरी याची सदिच्छा शिंदे ही मुख्य मदतनीस असून गर्भलिंग निदनातील सर्व पैसे हे तिच्याच अकाउंटवर ट्रान्सफर व्हायचे अशी धक्कादायक माहिती समोर आली आहे.
मिळत असलेल्या माहितीनुसार, गर्भलिंग निदान टोळीतील मुख्य सूत्रधार असणाऱ्या अण्णासाहेब गिरी याचे लिंग निदानाच्या पैशांचे व्यवहार आरोपी सदिच्छा शिंदे हिच्या बँक खात्यावर होत असल्याचा मोठा खुलासा तपासातून पुढे आला आहे. महिलांचे गर्भलिंग निदान, चेकिंगचे हे संपूर्ण रॅकेट शिंदवणे येथील फार्म हाऊस आणि सिताई हाके नगर येथील फ्लॅटवर चालत होते.
गुन्ह्यात सहभागी असलेल्या कोणाचीही गय केली जाणार नाही, ‘पुणे ग्रामिण पोलिसांचा गंभीर ईशारा’ – पुणे ग्रामीण पोलीस दलाच्या विशेष तपास पथक (SIT) आणि यवत पोलीस ठाण्याने सामाजिक स्वास्थ्याला घातक ठरणारे बेकायदेशीर लिंग निदान व स्त्री-भ्रूणहत्येचे रॅकेट समुळ नष्ट करण्यासाठी धडक कारवाई सुरु ठेवली आहे. या खळबळजनक गुन्ह्याच्या सखोल तपासादरम्यान गुन्ह्यातील मुख्य सूत्रधाराची जवळची मदतनीस असलेली आरोपी सदिच्छा दिलीप शिंदे उर्फ सदिच्छा लक्ष्मण भोसले (वय २३ वर्षे) हिला यवत पोलीस ठाण्याच्या तपास पथकाने रीतसर अटक केली आहे.
डॉ.संगीता गायकवाडच्या पोलिस कोठडीत अनेक गुपिते बाहेर पडू लागली – या गुन्ह्यात या पूर्वी अटक करण्यात आलेली मुख्य आरोपी डॉ. संगीता गायकवाड हिच्या पोलीस कोठडीतील सखोल तपासादरम्यान आणि तांत्रिक विश्लेषणावरून धक्कादायक माहिती समोर आली आहे. अटक आरोपी सदिच्छा शिंदे ही या रॅकेटमधील मुख्य दुवा व मुख्य सुत्रधाराची जवळची मदतनीस असून, ती तोतया (बोगस) डॉक्टर अण्णासाहेब गिरी याच्यासोबत थेट संपर्कात होती. सदिच्छा शिंदे ही गरोदर महिलांच्या घरी, तसेच मुख्य आरोपीच्या शिंदवणी येथील फार्म हाऊसवर आणि सिताई हाके नगर येथील फ्लॅटवर ‘गरोदर महिलांना आणून, पोर्टेबल सोनोग्राफी मशीनद्वारे बेकायदेशीररित्या गर्भलिंग निदान करण्याच्या गन्ह्यात थेट सहभागी असायची
विशेष म्हणजे, या बेकायदेशीर कृत्यातून मिळणारी मोठी रक्कम (गुन्ह्यातील लाभाचे पैसे) ही आरोपी सदिच्छा झिंदे हिच्या बँक खात्यावर घेतली जात असल्याचे तपासात उघड झाले आहे. त्यानंतर गरोदर महिलेच्या गर्भातील अर्भक हे स्त्री जातीचे (मुलगी) असल्याचे निष्पन्न झाल्यावर, संबंधित महिलांना केडगाव येथील ‘पार्थ हॉस्पिटल’ मध्ये बेकायदेशी गर्भपातासाठी (स्त्री-भ्रूणहत्या करण्यासाठी) पाठवले जात होते. रुग्णालयात गर्भपात केला जात असताना देखील आरोपी सदिच्छ शिंदे तिथे प्रत्यक्ष हजर असायची, असे तपासात निष्पन्न झाले आहे.
लिंग निदानाचे प्रकार भयानक आहेत, कोण कितीही मोठा असला तरी त्याची गय केली जाणार नाही, यातील कुणालाही सोडणार नाही असा ईशारा यवत पोलिस ठाण्याचे पोलीस निरीक्षक संतोष तासगावकर यांनी दिला आहे.
