रिपोर्टर – जावेद इनामदार
सुपा (बारामती) : कागदपत्रे काढण्यासाठी आणि जमिनींची खरेदी विक्री करताना शेतकरी आणि नागरिकांची होणारी दमछाक थांबविण्यासाठी बारामती तालुक्यातील सुपा येथे त्वरित सब रजिस्ट्रार ऑफिस आणि सिटीसर्वे ऑफिस सुरु करण्यात यावे तसेच सुपा येथे बांधण्यात आलेला फिल्टर प्लांट टेस्टिंग होऊन सुपा येथील नागरिकांना त्याचा लाभ मिळावा अशी लेखी विनंती बारामती कृषी उत्पन्न बाजार समितीचे मा.सभापती शौकत कोतवाल यांनी उपमुख्यमंत्री सुनेत्राताई अजितदादा पवार यांच्याकडे केली आहे.
सुपा आणि परिसरात असणाऱ्या विविध गावांतील नागरिकांना सिटी सर्वेची कागदपत्रे काढण्यासाठी सुमारे तीस किलोमीटरचा प्रवास करुन वडगाव निंबाळकरला जावे लागते तर जमिनींचे ई करार, बोजा, खरेदी विक्री इत्यादी कामे करण्यासाठी जवळपास अठरा ते वीस किलोमीटर दूर केडगाव येथे जावे लागते. जुन्या काळात ही कार्यालये येथे कार्यान्वित होती मात्र कालांतराने ती अन्य ठिकाणी हलविण्यात आली असे जेष्ठ नागरिक माहिती देताना सांगतात.
त्यामुळे नागरिक आणि शेतकऱ्यांची अडचण पाहता सुपा येथे जर लवकरात लवकर ही दोन्ही कार्यालये सुरु करण्यात आली तर सुपा आणि त्याच्या आजूबाजूला असणाऱ्या तीस ते चाळीस गावांना याचा मोठा फायदा होणार असून यामुळे येथील नागरिक आणि शेतकऱ्यांचा वेळ आणि इंधन दोन्ही वाचणार आहेत अशी विनंती मा.सभापती शौकत कोतवाल यांनी उपमुख्यमंत्री सुनेत्राताई पवार यांना लेखी निवेदनाद्वारे केली आहे.
टेस्टिंग होऊन फिल्टर प्लांट सुरु व्हावा अशीही मागणी – सुपा येथे फिल्टर प्लांट चे काम जवळपास पूर्ण झाले आहे. येथील टॅंकमध्ये पाणी सोडून टेस्टिंग घ्यायचे बाकी आहे त्यामुळे येथील फिल्टर प्लांट टँकमध्ये पाणी सोडून जर टेस्टिंग झाले तर याचा मोठा फायदा सुपा ग्रामस्थांना होणार आहे त्यामुळे या प्लांट ची त्वरित टेस्टिंग घेऊन नागरिकांना फिल्टर पाणी उपलब्ध व्हावे अशीही मागणी कोतवाल यांनी केली आहे.
