जावेद बाबुलाल इनामदार
सुपा (बारामती) : बारामती तालुक्यातील सुपा येथे दिनांक 13/06/2026 रोजी रात्री 09.00 च्या दरम्यान पीडीसीसी बँक परिसरात शितल विकास टेमगिरे (रा. भरतगाव, ता. दौंड, जि. पुणे) यांचे गळ्यातील दीड तोळे वजनाचे सोन्याचे मंगळसूत्र हरवले होते. याबाबत त्यांनी सुपा पोलीस स्टेशन येथे संपर्क साधून मदतीची विनंती केली.
सदर घटनेची माहिती मिळताच सुपा पोलीस स्टेशनचे प्रभारी अधिकारी सहाय्यक पोलीस निरीक्षक मनोजकुमार नवसरे यांनी तात्काळ गुन्हे शोध पथकास तपासाच्या सूचना दिल्या. त्यानुसार पोलीस कॉन्स्टेबल किसनराव ताडगे, पोलीस कॉन्स्टेबल महादेव साळुंखे व पोलीस कॉन्स्टेबल भाऊसाहेब चौधरी यांनी तत्काळ घटनास्थळी जाऊन परिसरातील सीसीटीव्ही फुटेजची पडताळणी केली तसेच गोपनीय माहितीच्या आधारे शोधकार्य सुरू केले.
सखोल तपासादरम्यान सदर मनी मंगळसूत्र एका महिलेस मिळून आल्याचे निष्पन्न झाले. त्यानंतर संबंधित महिलेकडून मंगळसूत्र ताब्यात घेऊन ते मूळ मालक शितल विकास टेमगिरे यांना परत करण्यात आले. हरवलेले मंगळसूत्र अल्पावधीत शोधून दिल्याबद्दल शितल विकास टेमगिरे यांनी सुपा पोलीस स्टेशनच्या अधिकारी व अंमलदारांचे आभार व्यक्त केले.
सदरची कारवाई पोलीस अधीक्षक संदीप सिंह गिल, अप्पर पोलीस अधीक्षक गणेश बिराजदार, पोलीस उपविभागीय अधिकारी सुदर्शन राठोड तसेच सुपा पोलीस स्टेशनचे प्रभारी अधिकारी सहाय्यक पोलीस निरीक्षक मनोजकुमार नवसरे यांच्या मार्गदर्शनाखाली सुपा पोलीस स्टेशन येथील गुन्हे शोध पथकातील कर्मचारी पोलीस कॉन्स्टेबल किसनराव ताडगे, पोलीस कॉन्स्टेबल महादेव साळुंखे व पोलीस कॉन्स्टेबल भाऊसाहेब चौधरी यांनी यशस्वीरित्या पार पाडली.
सुपा पोलीस स्टेशनतर्फे नागरिकांना आवाहन करण्यात येते की, कोणतीही मौल्यवान वस्तू हरवल्यास अथवा संशयास्पद बाब आढळल्यास तात्काळ पोलीसांशी संपर्क साधून सहकार्य करावे.
