केडगाव, दौंड : दौंड तालुक्यातील केडगाव स्टेशन येथे एका युवकावर तिघाजणांनी लोखंडी रॉड आणि घातक शस्त्रांनी जीवघेणा हल्ला केल्याची गंभीर घटना आज दि.११ जून रोजी रात्री साडे नऊ वाजण्याच्या दरम्यान घडली आहे.
सूत्रांकडून मिळत असलेल्या माहितीनुसार या हल्ल्यात विशाल अवधूते नावाचा युवक जखमी झाला असून त्याला केडगाव स्टेशन येथील खाजगी हॉस्पिटलमध्ये उपचारासाठी दाखल करण्यात आले आहे. भोसले नामक तरुण आणि त्याचे दोन साथीदार अश्या तिघांनी या युवकावर लोखंडी रॉड आणि घातक हत्याराने हल्ला केला असल्याची माहिती मिळत आहे. हल्ला होत असताना तेथे असलेल्या एका दुकानदाराने हल्लेखोरांकडील शस्त्र हाताने पकडल्याने त्याचा वर्मी घाव रोखला गेल्याने त्या युवकाचा जीव वाचल्याची चर्चा नागरिकांमध्ये सुरु आहे.
केडगाव पोलिस चौकीच्या बाजूलाच असलेल्या दुकानाजवळ हा हल्ला झाला आहे. त्या युवकावर हल्ला होत असताना दुकानदार आणि काही नागरिकांनी हस्तक्षेप केला तर काही वेळातच तेथे केडगाव पोलिस चौकीतील पोलिस आल्याने हल्लेखोर तरुण तेथून पसार झाले आहेत.
केडगावमध्ये भाईगिरीची क्रेज येऊ लागली – दौंड तालुक्यातील केडगाव हे तसे शांत आणि प्रगतशील गाव म्हणून त्याची ओळख आहे. मात्र या गावात जसजशी बाहेरून येऊन येथे स्थायिक होणाऱ्यांची संख्या वाढू लागली आहे तसतसे येथील भाईगिरीचे प्रमाण वाढू लागले आहे. एक गाडी घ्यायची, चित्रपटातील विलन कम हिरो ची स्टाईल करायची आणि त्या गाडीत दोन तीन टुकार बसवून लोकांवर आणि सर्वसामान्य जनतेवर अरेरावी करायची असा फंडा आता उदयास आला आहे. या सर्व भाईगिरी प्रकारातून दिवसेंदिवस केडगावमध्ये असे कांड घडू लागले आहेत त्यामुळे आता यवत पोलिसांनी अश्या भाईंचा बंदोबस्त करण्याची गरज निर्माण झाली आहे.
