अब्बास शेख
दौंड : पुणे जिल्हापरिषदेचे अध्यक्ष विरधवल जगदाळे यांच्या मातोश्री आणि दौंड तालुक्याच्या पहिल्या महिला आमदार उषादेवीताई कृष्णराव उर्फ बाळासाहेब जगदाळे पाटील यांचे वृद्धापकाळाने निधन झाले आहे. प्रकृती अस्वस्थामुळे त्यांच्यावर पुण्यातील एका दवाखान्यात उपचार सुरू होते.
उषादेवी ताई जगदाळे यांच्या निधनाची बातमी समजताच विविध क्षेत्रातील मान्यवरांनी त्यांना सोशल मिडिया तसेच त्यांच्या कुटुंबियांना संपर्क साधून दुःख व्यक्त करत श्रद्धांजली वाहिली. दौंड चे आमदार राहुल कुल तसेच माजी आमदार रमेश थोरात यांनीही आपल्या सोशल मिडिया पेजवर त्यांना श्रद्धांजली वाहत त्यांच्या राजकीय कारकिर्दीचा आवर्जून उल्लेख केला.
उषादेवी बाळासाहेब जगदाळे यांनी दोनवेळा दौंडचे आमदारपद भूषविले होते. १९७२ साली त्यांनी काँग्रेस पक्षाकडून निवडणूक लढवत मोठा विजय संपादन केला होता.
त्यानंतर १९८० मध्ये त्यांचे पती कृष्णराव उर्फ बाळासाहेब जगदाळे पाटील हे आमदारपदी विराजमान झाले होते तर १९८५ मध्ये पुन्हा उषादेवी जगदाळे या दौंड तालुक्याच्या आमदार म्हणून निवडून आल्या. राजकारणातील प्रत्येक लहान सहान गोष्टींचा त्यांना गाढा अभ्यास होता. त्यांचे दौंड तालुक्यासाठी मोठे योगदान होते. आई साहेब अशी त्यांना दौंड च्या जनतेने उपाधी दिली होती. बाळासाहेब जगदाळे यांचे १ डिसेंबर २०१८ रोजी निधन झाले होते.
जगदाळे कुटुंबियांना दौंडकरांनी भरभरून प्रेम दिले असून पुणे जिल्हा परिषदेचे अध्यक्ष विरधवल जगदाळे हे त्यांचे सुपुत्र आहेत तर दुसरे पुत्र इंद्रजित जगदाळे हे दौंड नगरपरिषदेचे माजी नगराध्यक्ष तसेच विद्यमान नगरसेवक असून त्यांची पुत्री आणि उषादेवी जगदाळे यांची नात दुर्गादेवी जगदाळे या दौंड नगर परिषदेच्या विद्यमान नगराध्यक्षा आहेत.
उषादेवी जगदाळे यांच्या निधनाची माहिती खुद्द विरधवल जगदाळे यांनी आपल्या सोशल मिडिया हॅण्डलवरून दिली असून आज दि. १४ मे रोजी सायंकाळी ६:०० वाजता त्यांच्यावर दौंड शहरातील भीमा नदीतीरावर असलेल्या स्मशानभूमीत अंत्यसंस्कार करण्यात येणार आहेत.
