दौंड : ग्रामीण भागातील विद्यार्थ्यांमध्ये वैज्ञानिक दृष्टिकोन रुजावा आणि त्यांनी जागतिक स्पर्धेत आत्मविश्वासाने उभे राहावे, यासाठी दौंड तालुक्यातील शाळांना आधुनिक तंत्रज्ञानाची जोड देणे ही काळाची गरज आहे. गरदरेवाडी येथील जिल्हा परिषद शाळेत उभारलेली ‘स्टेम लॅब’ हे ग्रामीण शाळा ‘हायटेक’ होत असल्याचे उत्तम उदाहरण असून, तालुक्यातील प्रत्येक विद्यार्थी आधुनिक शिक्षणाशी जोडला जावा यासाठी आपण कटिबद्ध आहोत, असे प्रतिपादन आमदार राहुल कुल यांनी केले.
दौंड तालुक्यातील गरदरेवाडी-वडगाबांडे येथील जिल्हा परिषद शाळेत उभारण्यात आलेल्या अत्याधुनिक स्टेम (STEM) लॅब व बहुउद्देशीय सभागृहाचा लोकार्पण सोहळा राज्याचे शालेय शिक्षण मंत्री दादा भुसे यांच्या शुभहस्ते संपन्न झाला. याच कार्यक्रमात राज्यस्तरीय “गुढीपाडवा पट वाढवा” या अभियानाचा शुभारंभही करण्यात आला.
यावेळी बोलताना शिक्षणमंत्री दादा भुसे म्हणाले की, “आदर्श आणि स्मार्ट शाळा घडवण्यासाठी शासन स्तरावर प्रयत्न सुरू आहेत. गरदरेवाडी शाळेतील आधुनिक सुविधा, स्टेम लॅब आणि प्रगत शैक्षणिक उपक्रम पाहून समाधान वाटते. पुस्तकी ज्ञानासोबतच विज्ञान, तंत्रज्ञान, अभियांत्रिकी आणि गणित (STEM) या विषयांचे प्रात्यक्षिक ज्ञान ग्रामीण मुलांना मिळणे ही मोठी क्रांती आहे. दौंड तालुक्यात राबवलेला हा शैक्षणिक प्रयोग कौतुकास्पद असून राज्यातील इतर शाळांसाठी तो दिशादर्शक ठरेल.”
याप्रसंगी आमदार राहुल कुल म्हणाले की, ग्रामीण भागातील मुलांच्या सर्जनशीलतेला आणि ‘इनोव्हेशन’ला चालना देण्यासाठी ही लॅब उभारली आहे. शाळेत केवळ शिक्षणच नव्हे, तर खेळ, ध्यानधारणा आणि योग्य आहार यावरही विशेष लक्ष दिले जात आहे. सीएसआर (CSR) च्या माध्यमातून आणि लोकसहभागातून तालुक्यातील इतर शाळांमध्येही अशाच प्रकारच्या सोयी-सुविधा उपलब्ध करून देण्यासाठी आमचा सातत्याने पाठपुरावा सुरू आहे.
या कार्यक्रमाला जिल्हा परिषद अध्यक्ष वीरधवल जगदाळे, उपाध्यक्ष विवेक वळसे-पाटील, महाराष्ट्र राज्य शैक्षणिक परिषदेचे संचालक डॉ. हेमंत वसेकर, जिल्हा परिषदेचे मुख्य कार्यकारी अधिकारी गजानन पाटील, प्राथमिक शिक्षण संचालक शरद गोसावी, माध्यमिक शिक्षण संचालक महेश पालकर, उपसंचालक गणपत मोरे, दौंड पंचायत समितीचे सभापती सुखदेव चोरमले, स्थानिक पदाधिकारी, ग्रामस्थ, शिक्षकवृंद आणि विद्यार्थी मोठ्या संख्येने उपस्थित होते.
कार्यक्रमाचे प्रास्ताविक आणि स्वागत झाल्यानंतर उपस्थितांनी शाळेतील विविध शैक्षणिक उपक्रमांची व स्टेम लॅबची पाहणी केली. गरदरेवाडीच्या ग्रामस्थांनी आणि शिक्षकांनी शाळेचा कायापालट करण्यासाठी घेतलेल्या परिश्रमांचे सर्व स्तरांतून कौतुक होत आहे.
