दौंड : दौंड (जि.पुणे) येथील भूमी अभिलेख कार्यालयात लाच घेणारी महिला अधिकारी आणि तिच्या सोबत काम करणाऱ्या खाजगी सर्वेयरला लाचलूचपत विभागाच्या टीमने रंगेहात पकडून त्यांना न्यायालयात हजर केले असता मा.न्यायालयाने या दोघांनाही 23 तारखेपर्यंत पोलिस कोठडी सुनावली आहे.
वैशाली चंद्रकांत धसकटे (रा.केडगाव ता.दौंड, परीक्षण भुमापक, दौंड भूमिअभिलेख कार्यालय) आणि फय्याज दाऊद शेख (रा.पानसरे वस्ती दौंड, खाजगी सहाय्यक सर्वेयर) अशी या दोन आरोपिंची नावे आहेत. तक्रारदारचा वडिलोपार्जित जमिन वाटपाचा दावा दौंड सिविल कोर्टात चालू होता. त्या दाव्यामध्ये कोर्टाने तक्रारदाराच्या सामायिक जमिनीचा हिस्सा ठरवून मा. जिल्हाधिकारी यांना जमिनीचे वाटप करून घेण्याबाबत आदेशीत केले होते. यानंतर तहसीलदार, दौड यांनी उपाधीक्षक भूमी अभिलेख, दौड यांना तक्रारदाराच्या सामायिक जमिनीची मोजणी करून वाटप तक्ता सादर करण्याकरीता आदेशित केले होते.
त्याप्रमाणे ते प्रकरण उपाधीक्षक भूमी अभिलेख दौंड यांच्याकडे आल्यानंतर तक्रारदाराच्या सामायिक जमिनीची मोजणी यातील आरोपी लोकसेवक वैशाली धसकटे यांनी केली होती. तक्रारदाराच्या सामायिक जमिनीची केलेल्या मोजणीचा अहवाल आणि वाटप तक्ता तयार करून उपाधीक्षक भूमि अभिलेख दौंड यांची सही घेऊन तो प्रस्ताव तहसीलदार, दौँड यांना सादर करण्याकरता व तक्रारदारास ‘क’ प्रत देण्याकरिता यातील आरोपी लोकसेविका श्रीमती धसकटे यांनी तक्रारदाराकडे 15,000 रुपयांच्या लाचेची मागणी केली होती. त्यानंतर तक्रारदाराने लाचलूचपत विभागाकडे तक्रार केली होती.
लोकसेवक श्रीमती वैशाली धसकटे यांनी पंचासमक्ष तक्रारदाराकडे 15,000/- रुपयांची लाच मागून तडजोडीअंती 14,000/- रुपये लाच मागितल्याचे निष्पन्न झाले होते. त्यानंतर दिनांक 20/08/2025 रोजी सापळा कारवाई दरम्यान आरोपी लोकसेविका श्रीमती धसकटे यांच्या सांगण्यावरून आरोपी क्र. 2 फय्याज शेख याने उपाधीक्षक भूमी अभिलेख, दौंड यांच्या कार्यालयाच्या आवारात 10,000/- रुपयांची लाच स्विकारली असता दोन्ही आरोपी यांना ‘एसीबी’कडून ताब्यात घेण्यात आले होते.
वरील दोन्ही आरोपिंविरुद्ध दौंड पोलीस स्टेशन येथे गुन्हा दाखल करण्यात येऊन त्यांना आज न्यायालयात उभे केले असता मा.न्यायालयाने दोन्ही आरोपिंना दि. 23 ऑगस्टपर्यंत पोलिस कोठडी सुनावली आहे.
