पुणे : सध्या संपूर्ण राज्यात आणि देश विदेशात गाजत असणारा ‘छावा’ हा हिंदी चित्रपट करमुक्त करण्यात यावा अशी मागणी दौंडचे आमदार राहुल कुल यांनी राज्याचे मुख्यमंत्री देवेंद्र फडणवीस यांच्याकडे केली आहे.
राज्याचे मुख्यमंत्री देवेंद्र फडणवीस हे आज दि.१९ फेब्रुवारी रोजी पुणे दौऱ्यावर आले आहेत. यावेळी आमदार राहुल कुल यांनी त्यांची भेट घेऊन छावा हा हिंदी चित्रपट महाराष्ट्रात करमुक्त करण्यात यावा अशी मागणी त्यांच्याकडे केली आहे.
आमदार राहुल कुल यांनी मुख्यमंत्री फडणवीस यांची भेट घेऊन त्यांना छावा करमुक्त करण्याविषयी पत्र दिले असून त्यामध्ये, हा चित्रपट छत्रपती संभाजी महाराजांच्या प्रेरणादायी जीवनाचे चित्रण करणारा चित्रपट असून तो महाराष्ट्रात करमुक्त केल्याने, विद्यार्थी आणि सामान्य नागरिकांसह मोठ्यासंख्येने प्रेक्षकांना कोणत्याही आर्थिक बोजाशिवाय आपल्या राज्याचा समृद्ध इतिहास पाहण्याची आणि शिकण्याची संधी मिळेल.
त्यामुळे या विनंतीचा सकारात्मक विचार करून राज्यभर छावा चित्रपट करमुक्त करण्यासाठी आवश्यक पावले उचलावीत अशी मागणी आमदार राहुल कुल यांनी या पत्राद्वारे त्यांना केली असून याबाबत मुख्यमंत्री देवेंद्र फडणवीस यांनी सकारात्मक कार्यवाहीचे आश्वासन दिले आहे.
