सुपे : बारामती तालुक्यातील बाबुर्डी येथील शेरेवाडी परिसरात दोन ज्येष्ठ महिलांची झोपेतच गळा चिरून हत्या करण्यात आल्याची धक्कादायक घटना मंगळवार २९ सप्टेंबर रोजी उघडकीस आली होती. या घटनेमुळे संपूर्ण परिसर हादरून गेला होता. हा खून चोरीच्या उद्देशाने केला असावा किंवा हा खून जमिनीच्या वादातून केला गेला असावा असे तर्कवितर्क लावले जात होते. मात्र पुणे ग्रामिण पोलिसांनी काही दिवसांतच या खुनाचा छडा लावला असून यातील आरोपी हा त्या महिलांचा नातेवाईकच असल्याचे आता पुढे आले आहे.
सूत्रांकडून मिळालेल्या माहितीनुसार इंदुबाई मारुती लडकत (वय ७५) आणि कृष्णाबाई कुंडलिक लडकत (वय ६५) या दोन जेष्ठ महिलांचा अतिशय निर्दयीपणे गळा चिरून खून करण्यात आला होता. हा खून झाला तेव्हा दोन्ही महिला सोमवारी रात्री इंदुबाई लडकत यांच्या घराच्या ओसरीबाहेर झोपल्या होत्या. मंगळवारी सकाळी शेजाऱ्यांच्या निदर्शनास दोघींचे मृतदेह आल्याने हा भयानक प्रकार उघडकीस आला होता. दोघींचीही झोपेतच गळा चिरून हत्या करण्यात आल्याने संपूर्ण परिसर हादरून गेला होता.
पोलिसांची विविध पथके या खुनाचा शोध घेत असताना पोलिसांना या खुनाबाबत महत्वाचे धागेदोरे हाती लागले आणि त्यांनी एका २५ वर्षीय युवकाला ताब्यात घेऊन त्याची कसून चौकशी केल्यानंतर त्याने या खूनाची कबुली दिली. सदर युवक हा चोरीच्या उद्देशाने घरात घुसला होता आणि त्याला चोरी करताना सदर महिलांनी पाहिल्यानंतर त्याने या दोघींचेही धारदार शस्त्राने गळे कापून त्यांना तेथेच संपवले अशी माहिती मिळत आहे. याबाबत पोलीस अधिक्षक आणि उप अधिक्षक लवकरच याची माहिती देणार असून यामध्ये सदर युवकाचे नाव आणि त्याचा खुनाचा उद्देश अधिकपणे स्पष्ट होणार आहे.
