|सहकारनामा|
दौंड : शहर प्रतिनिधी (अख्तर काझी)
शहरातील गोपाळवाडी रोड परिसरात महिले कडील 75 हजार रुपयांची (अडीच तोळे) सोनसाखळी दुचाकीस्वार चोरट्यांनी धूम स्टाईल हिसकावून नेल्याची घटना घडली. याप्रकरणी संजना विजय नानावानी (रा. कुंभार गल्ली, दौंड) यांनी फिर्याद दिली असून दौंड पोलिसांनी अज्ञात चोरट्यां विरोधात गुन्हा दाखल केला आहे.
घटनेबाबत दौंड पोलिसांनी दिलेली माहिती अशी की,दि.31 जुलै रोजी दुपारी 12.30वा. दरम्यान फिर्यादी महिला दुचाकीवरून आपल्या पतीसोबत गोपाळवाडी रोड, सरपंच वस्ती येथून कुंभार गल्ली येथील आपल्या घरी जात होत्या. त्यांच्या मागून दोन अज्ञात इसम काळ्या रंगाच्या दुचाकीवरून येत होते. फिर्यादीच्या दुचाकीचा वेग कमी झाल्याचे पाहून पाठीमागून दुचाकीवरून आलेल्या इसमाने फिर्यादीच्या गळ्यातील 75 हजार रुपये किमतीची सोन्याची साखळी हिसकावली व धूम स्टाईल पळ काढला. चोरट्यांनी सोनसाखळी हिसकावून ते शालिमार चौकाकडे पळाल्याचे फिर्यादी यांनी सांगितल्याने पोलीस निरीक्षक नारायण पवार यांनी तत्काळ या परिसरातील CCTV फुटेजची पाहणी केली असता एका ठिकाणच्या फुटेजमध्ये हे दुचाकीवरील चोरटे कैद झाले आहेत.
या आरोपींना कोणी ओळखत असल्यास त्यांनी दौंड पोलिसांशी संपर्क साधावा असे आवाहन दौंड पोलिसांनी केले आहे.
