बारामती : तक्रारदाराविरुद्ध कारवाई न करण्यासाठी तब्बल ७ लाख रुपयांची लाच मागून त्यातील ५ लाख रुपये स्वीकारताना बारामती तालुका पोलीस ठाण्यातील पोलीस हवालदाराला पुणे लाचलुचपत प्रतिबंधक विभागाच्या पथकाने रंगेहाथ पकडले. ही कारवाई आज ८ सप्टेंबर रोजी करण्यात आली.
पोलिसांकडून मिळालेल्या माहितीनुसार, यातील तक्रारदाराची पत्नी ह्या झुंबा डान्स क्लास व जिम चालवतात. या क्लासमुळे त्रस्त झालेल्या नागरिकांनी क्लास व त्याच्या अनुषंगाने तक्रारदार व त्यांच्या पत्नीविरुद्ध पोलीस स्टेशनला तक्रारी अर्ज करुन कारवाई करण्याची मागणी केली होती. याप्रकरणी तक्रारदारांचा अर्ज चौकशीसाठी महेश अंकुश उगले (पोलीस हवालदार, नेमणूक बारामती तालुका पोलीस ठाणे) यांच्याकडे आल्यानंतर त्यांनी कारवाई न करण्यासाठी तक्रारदाराकडे ७ लाख रुपयांची लाच मागितली, त्यानंतर तक्रारदार यांनी याची तक्रार लाचलुचपत विभागाकडे केली.
या अनुषंगाने लाचलुचपत विभागाच्या पथकाने तक्रारीची पडताळणी केल्यानंतर आरोपीने ७ लाख रुपयांच्या लाचेपैकी २ लाख रुपये स्वीकारल्याचे मान्य करुन उर्वरित ५ लाख रुपये देण्याची मागणी केल्याचे निष्पन्न झाले. त्यानंतर सदर पथकाकडून सापळा रचण्यात आला. सापळा कारवाईदरम्यान आरोपी महेश उगले यांनी तक्रारदाराकडून पी.डी.सी.सी. बँकेजवळ, माळेगाव रोड, बारामती येथे ५ लाख रुपये स्वीकारले असता त्यांना दुपारी ३.०२ वाजता रंगेहाथ पकडण्यात आले. या प्रकरणी बारामती शहर पोलीस ठाण्यात भ्रष्टाचार प्रतिबंध अधिनियम १९८८ चे कलम ७ अन्वये गुन्हा दाखल करण्याची प्रक्रिया सुरू आहे. आरोपी महेश उगले यांना दुपारी ३.०२ वाजता ताब्यात घेण्यात आले.
ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील, (लाचलुचपत प्रतिबंधक विभाग, पुणे) पोलीस उपअधीक्षक सतीश वाळके यांच्या मार्गदर्शनाखाली पोलीस निरीक्षक संतोष पाटील, पोलीस हवालदार प्रवीण तावरे, पोलीस कॉन्स्टेबल आशिष कमकर आणि चालक पोलीस कॉन्स्टेबल चंद्रकांत कदम यांच्या पथकाने केली आहे.
